A chung berah Ibra awmna Milan Goal nen Ronaldo a lo kir leh ta

Serie A nomawi inchuh leh season kal lai chu kum dang aiin a ngaihnawm chhunzawm zel. Zlatan Ibrahimovic-a'n goal danglam khungin AC Milan chu Udinese mualah 2-1 in hnehna a chanpui a, league hmahruaitu an ni chhunzawm.

Pathianni zan inkhel dangah Cristiano Ronaldo chuan Covid-19 a hneh tawh tih chu goal hnih hmangin a lantir. Portuguese forward hian Italian champion Juventus chu Spezia mualah 4-1 in hnehna a chanpui ve bawk. Nomawi chuh ngam tur zinga mi Napoli erawh an mikhual Sassuolo lakah 2-0 in an chak lo.

Zlatan Ibrahimovic-a'n 'Uain ṭha mi' a nihzia a lantir zel, Swede striker hian Franck Kessie goal khung tur a siamsak bakah an chakna goal chu ropui takin a 'bin' lut a, tun season Serie A match li a khelh aṭangin goal sarih a khung tling der!

Ibra hian box chhunga a ball chan chu hneh takin a khuap a, hun awl remchang a hmuh hmasak berah Kessie tan a pe - ani hian laklawh nei miah loin a khung. Udinese lamin Rodrigo de Paul-a penalty hmangin an si phurh an sut ve leh thung.

Chak zawk awm loin an inhnehtawk dawn niin a lang hman, mahse hun tawp hma minute sarih chauh a awm tawh tihah Ibra chuan defender pahnih Rodrigo Becao leh Sebastian de Maio bakah goalkeeper Juan Musso te ven karah chakna goal a 'bin' lut.

Kum 39 mi Ibrahimovic chuan, "Europe team hrang hrang thlir chuan chawhruala naupang pawl tak kan ni, kum chawhrual ti upa tu erawh ka ni. Mahse anni hian kum naupang tak ang maiin min awmtir," tiin a sawi.

Stefano Pioli enkawl Milan hian June thlaa football an khelh chhunzawm leh aṭang khan tlawm an la nei lo, inelna hrang hrangah match 24 zet an kaltluang mek tihna a ni - Serie A bikah point 16 hmuin a chung berah an awm.

Portugal tana a fehchhuahna lamah Ronaldo-a'n coronavirus a kai a, beisei angin a dam mai lo - endikna hmasa pathumah chuan hri a kai zel. A vawi linaah erawh a dam a, Spezia mualah inkhel bul ṭan ve lo mah se bench aṭanga a luh hnuah goal hnih a khung.

Old Lady tana Alvaro Morata goal khung chu mualneitu lamin Tommaso Pobega hmangin an sut a, chawlhlawk laiin 1-1 in an inhnehtawk. Minute 56-naah Ronaldo a rawn lut a, khelmual a luh aṭanga minute thum hnu lekah Morata ball pek chu a khung nghal.

Ronaldo-a'n a la duhtawk mai lo, a goal hmasa a khung dawna a tlan hel theih goalkeeper Ivan Provedel chu penalty aṭangin chiang takin a bum nawn. France international Adrien Rabiot chuan 'cool' taka goal khat thawh ve bawkin Juve an chak nuamsa hle.

Kum 35 mi Ronaldo chuan, "Hun rei tak chhung chu natna nei mang si loin ka inkhel thei lo, tunah chuan Cristiano a inkhel leh thei ta hi a pawimawh hle. Kan elpui Milan, Lazio leh Napoli ten an khel ṭha em em a, keini pawhin kan thawhrim a ngai," a ti.

Juventus manager Andrea Pirlo chuan a naute khelh danah a lawm thu a sawi a, Champions League-ah Barcelona hneh lo mah se an league match lama an insiamṭha nghal hi chanchin ṭha a ni. Nilaini zanah UCL khel turin Ferencvaros an lenchilh zui ang.