Stamford Bridge a nghing lo - Real ngamin Chelsea-in final an lut

Real Madrid midfielder ṭha mi Toni Kroos-a'n Chelsea nen an inkhelh hmain, "Ka career kum 15 chhungin kan khingpui tur vanga muttui loh ka nei ngai lo," a ti a, London club hi a nau en.

Mahse, zaninah erawh Kroos hi a muttui lo ang tih hrilh nawn kan ngai lo - Nilaini zan khan Champions League semifinal second leg-ah Chelsea chuan 2-0 in Real Madrid an hneh a, inkhel hmasa nena belhkhawmin 3-1 in an chak.

Chelsea tan Timo Werner leh Mason Mount-ten goal khat ve ve an khung a, Real-in a chhanletna tur an neih loh avangin European club football inelna sang ber final-ah English club pahnih kan hmu dawn.

Manchester City chuan final lut turin Paris Saint-Germain chu 4-1 in an lo hneh tawh a, English club pahnih hi May 29 zanah European champion tur zawngin an inkhel ang.

Ramos telna Real
Madrid khawpuiah club pahnih hi 1-1 in an lo inhnehtawk tawh a, he inkhelah hian Real tlarhnung khaikhawmtu leh team hruaitu ṭha Sergio Ramos chu hliam vangin a inlan lo thung.

Nilaini zanah erawh Ramos-a'n captain armband hreng chungin a team a ho thei ta a, Stamford Bridge fapa rangkachak ni ṭhin Eden Hazard chuan a club hlui tana ṭahna thlen tumin bul a ṭan bawk.

Mahse, Zinedine Zidane aia Thomas Tuchel-a chungnun zan a ni a, Chelsea-in inkhel ṭantir aṭangin game an thunun nghal a, a bik takin chau ve thei lo ang maia khel N'golo Kante leh Kai Havertz an hmuhnawm fal hle.

Offside vanga a goal khung hmasak zawk pawm a nih loh hnuah Timo Werner dan reng theih a ni lo a, minute 28-naah Havertz-a bar pet per let lehlam chu goal line aṭangin a tauh lut - Havertz hian Thibaut Courtois-a pet khum a, hei hian bar per mah se a per lehlam chu Werner hian a tauh lut a ni.

A tawpah Mount
Chelsea-in inkhel an thunun a, chance pawh an ngah hle - vawi 15 zet shot an nei a, heng zinga panga chu goal zawnah a kal. Blues vanneih zan ni se, goal tam zawk khung thei an ni.

Blues goalkeeper Thibaut Courtois chu hna ngah ber a ni a,Kante leh Havertz-te khung tur nia lang ṭha takin a dansak a, Mount -a'n duhthala zalenna a nei chungin a pet goal thei lo a, Havertz chuan bar-a tauh per bawk.

Real Madrid-in chance nei lo tawp an ni lo a, mahse, an striker chhuanvawr Karim Benzema thlawp zo tur hi an la nei lo ni berin a lang. French striker hian chance duhawm vawi hnih a nei a, mahse, Blues keeper Edouard Mendy-a'n ṭha zetin a dansak ve ve.

Hun tawp nan minute nga chauh a awm tawh tihah Chelsea bawkin goal an khung leh ta nge nge a, Christian Pulisic-a cross chu Mount chuan goal-ah a chantir - Real tan tho leh turin hunin a daih tawh lo.

Chelsea an ṭha
Season laihawl vel thlenga Chelsea mitthla chung chuan Champions League final an lut hi thil mak a tling a, chutihrual chuan he team hi Tuchel-a 'team' an nih tawh avangin Frank Lampard enkawl Chelsea nen khaikhin chi an ni lo.

Kante 'class' sawi nawn a ngai leh ṭhin a, Chelsea goal hnih luh nana French midfielder hnathawh theihnghilh a thiang lo a, khawvela midfielder inkawp hmuhnawm Luka Modric, Kroos leh Casemiro-te chu Kante hmaah an thamral.

Real tlarhnung chawk buaitu Havertz-a hmuhnawm takzet a, January thlenga Chelsea player leisual anga lang kha tunah chuan Blues-in an lak fuhzia an sawi an sawi tawh ang - Lampard-a hnuaia a ṭhat ang thoin Mount a la ṭha reng a, he English midfielder hi player hmuhnawm bik a ni.

Werner-a'n tun season-ah Blues tan match 47 khela goal 12 khungin assist vawi 10 a nei a, flop anga sawi a thiang ta lo. Blues hian bench aṭanga luhtir turin Pulisic an la nei cheu a, he team hi tunah chuan team ṭha 'bik' an ni tawh.

Real an chuai?
Chelsea-in Champions League final an lut a, an thiamnain fak a phu rualin an hneh tak Real Madrid team hi an uai thla ve ṭan ta niin a lang - Zidane tan team thar din a ngai.

Kum 33 mi Benzema hi la hlauhawm reng mah se thachhang dawltu rintlak a nei lo a, Ramos lo kir vangin Real phur viau mah se kum 35 mi defender hi a kum a tam ve ta deuh niin a lang.

Ramos ang thoin Luka Modric chu khel chhia tia sawi tur ni lo mah se kum 35 a ni ve tawh bawk a, Croatian midfielder hi mahni chauh pawha game thlak danglam thei tur khawpin a tha tho tawk ta lo.

Hazard-a'n bul ṭan mah se 100% a la ni lo tih chiang takin a lang a, La Liga nomawi bak beisei tur nei tawh lo Zidane-a'n season tharah Real-a la enkawl chhunzawm dawn a nih chuan squad thuam chak a ngaihtuah a ṭul ang.

"Real khan ball an chan hnem avangin kan tan a harsa a, minti buai hle. Mahse, counter-attack hmangin kan hlauhawm a, goal khung kan tum reng a, kan tlarhnung lam a nghin phah chuang si lo.
Second half kan khel ṭha lehzual a, goal kha khung hma zawk tur kan ni hial. Result ṭha tak a ni a, ka team-te ka lawmpui takzet a ni. Real hi chu engtiklai pawhin an hlauhawm ṭhin a, engmah lo maia kan ngaih hi thil hlauhawm takah an chhuah thei ṭhin. Chutiang ang team ṭha chu kan tum a, chance tam tak kan hloh chunga kan beiseina kan hloh lo kha a ropui lai chu a ni. He result kan nei thei hi ka hlim a, football-a ka hun hmang a, ka eizawn nana ka hmang thei hi ka lawm takzet a ni. Hetiang ang level sanga kan thlen chin hian minti lawm a, final hial kan khel leh tur hi ka phur a ni." - Thomas Tuchel, Chelsea manager

"Theihtawp chhuahin kan bei a, mahse, Chelsea khan hnehna chana final luh kha an phu zawk a ni. Ka player inkhelte khan khelh an phu avanga khel an ni a, ka chhuang takzet a ni. Hei leh chen kan thleng a, final kan luh lohna hi match khat chauh a ni. Chelsea an khel ṭha a, kan lawmpui mai tur niin ka hria. Goal nawr lamah hmasawn kan mamawh a, chance ṭha sawi tur kan nei lo. Chelsea lam erawhin chance an nei nual thung a, hei hi football chu a ni. Tunah chuan kan chawl hahdam ang a, La Liga lam kan ngaihtuah leh tawh ang. Semifinal-ah kan tlawm miau avangin hlim a har a, lawm taka result pawm a harsa hle. Mahse, naktukah training kan zawm ang a, theihtawp kan chhuah zui lehnghal dawn a ni." - Zinedine Zidane, Real Madrid manager

Inkhel Chhehvel

• Chelsea-in a vawi thum nan Champions League final an lut a, kum 2008 leh 2012 khan an lo lut tawh - Manchester United leh Liverpool-ten vawi li ve ve lut tawhin English club zinga Chelsea aia Champions League final lut hnem an ni.
• Thomas Tuchel-a'n 2019-20 season khan PSG chu Champions League final-ah a lo hruai thleng tawh a, season zawna European Cup/Champions League final-a team hran hruai thleng thei coach hmasa ber a ni.
• Tuchel-a'n Champions League-ah Real hi vawi ruk a hmachhawn tawh a, vawi hnih chakin, vawi li draw result a nei a, manager zingah heti zat Real hmachhawn chunga tlawm lo awmchhun a ni.
• Real-in Chelsea hi vawi nga an hmachhawn tawh a, vawi hnih inhnehtawkpuiin vawi thum an tlawm a, an club chanchinah heti zat an hmachhawn tawh an la hneh loh awmchhun an ni.
• Champions League chanchina a vawi thum nan final-ah English club an inthum dawn a, 2008 (Chelsea v Manchester United) leh 2019 (Liverpool v Tottenham) khan tiang hi a lo thleng tawh. Ram khat club-ten final an khelh vawi riatna tur a ni bawk a, Spanish club-te chu final-ah vawi thum an lo intawng tawh a, 2000 (Real Madrid vs Valencia) leh 2014 & 2016 (Real Madrid vs Atletico Madrid)-te khan a thleng.
• Timo Werner-a'n open play aṭangin a vawi khat nan Chelsea jersey ha chungin Champions League-ah goal a khung a, September 2019-a RB Leipzig tana Benfica laka goal-a khung hnua Champions League-a open play aṭanga goal-a khung leh hmasak ber a ni.
• Kum 22 leh ni 15 mi niin Mount chu Champions League semifinal-a English
mi goal khung thei naupang pahnihna a ni a, Wayne Rooney (kum 21 leh ni
182 vs Milan) chiah a tluk lo, Kum 2008-a Frank Lampard hnua Champions League semifinal-a Chelsea tana English mi goal khung thei hmasa ber a
ni bawk.
• Real Madrid manager Zinedine Zidane-a tan Champions League double-legged vawi 13-a hmachhawna a vawi hnih a tlawmna chauh a ni a, season hmasa khan last 16-ah Manchester City chu a lo ngam tawh lo.
• Chelsea goalkeeper Édouard Mendy-a'n match riat zet goal chhuah loin hun a hmang tawh a, English club tana Champions League season khata clean sheet nei hnem ber a ni.
• Chelsea hian Thomas Tuchel-a hnuaiah match 24 khel tawhin vawi 18 clean sheet (75%) an nei a, a thlak tak Frank Lampard-a'n (31%) match 84-a kaihhruaiah vawi 26 chiah Blues-in clean sheet an nei thung.