Saul Alvarez-a inpeih tawh

Pathianni zinga Saul 'Canelo' Alvarez leh Billy Joe Saunders inhnek turin thawm a neih belh zel a, Saul Alvarez chuan tun hnaia Saunders-a team-te chet dan avangin an inhnek tur chu a professional ang zawng ai maha 'mimal' taka a thlir tawh thu a sawi.

May 8 zan, keini lam sanaa Pathianni zing dar 8:30-ah boxer pahnih hi an inhnek dawn a, boxing ring len zawng avanga lungawi lo Saunders hi Thawhlehnia media an hmachhawn turah inlan lo mah se Nilaini khan a inlan - an inhnek ngei dawn ta niin a lang.

Boxer pahnih hi AT&T Stadium, Arlington, Texas-ah an inhnek dawn a, ring zau zawng hi 20ft lek ni tura ruahman a nih avangin Saunders-a team lam hi an lungawi lo a ni.

Alvarez chuan, "Boxing ring hi 20ft a ni fo ṭhin a, tunah 24ft a rawn duh thar vel a nih hi. A duh tak tak a nih chuan stadium pumpui pawh hi kan pe mai ang chu, ka tan awmzia a awm lo," a ti a, Saunders-a chhuanlam chu chhuanlam tling lo a nih thu a sawi.

Mexican boxer rothap chuan sawizawmin, "Tunah chuan a mimal ang takin min chona hi ka thlir tawh a ni. Tun hnai kum li chhungin ka chanchin a sawi nasa em em a, ni rei loteah kan intawng dawn ta," a ti.

Saunders hian a ke hman thiam leh movement ṭha chu a larpui a, hei vang tak hian ring pawh a te lutuk tiin an sawisel - Alvarez erawhin buaina a nei lo.

Vawi 58 fight-a hmachhawn tawha tlawm la nei lo fighter chuan, "Saunders-a hian ka muttui loh phahna tur khawp thiamna a nei lo. Hetiang level-ah chuan eng pawh tawk ila inpeih tur ka ni a, eng thil pawh hmachhawn turin ka inpeih.

"Saunders-a thiamna ka hai lo a, fighter ṭha tak a ni tih pawh ka hria. Mahse, 100% in training ka nei ṭha a, ka ṭhat dan berin ka awm mek a ni," a ti.

Hetihlai hian Saunders chuan, "Keimah ang boxer hi i la tawng ngai lo, i tlanchhiat zel vang a ni," tiin Alvarez-a cho ve thung a, British boxer hian vawi 30 inhnek a hmachhawnah tlawm a la nei lo.

Kum 30 mi Alvarez hian WBC leh WBA world super-middleweight title-a kawl mek a, Saunders hian WBO title a kawl thung - super-middleweight title lian tham pali zinga pathum an inchuh dawn tihna a ni a, boxer rothap pahnih inhnek hi a hmunah mi 60,000 velin an en tura ngaih a ni.