World Cup qualifier an sawn

Africa ram ten June thla aṭanga 2022 World Cup qualifier an khelh tur chu a hun pangngaiah an khel thei dawn lo, football thuneitu sang FIFA chuan September thlaah neih ṭan zawk turin a ti.

World Cup-ah African khawmualpui hian hmun ruak panga a nei a, heng a hmun ruakte hi ram 40-in an inchuh ṭhin. Ruahman lawk dan chuan kumin June thla aṭang hian qualifier hi khelh tur a ni, mahse coronavirus vangin a hun sawn a ngai.

FIFA chuan thu chhuah siamin, "Covid-19 vangin ram hrang hrang in zin pawh a la rem chiah lo, hrileng vangin a hun sawn a ngai. World Cup Qatar 2022 khel tur zawnna chu June thlaah ni loin September aṭanga khelh ṭan a ni ang.

"September leh October bakah hian nakkum November thla leh kum 2022 March thlaah te khelh a ni ang," an ti a, Confederation of African Football pawhin FIFA ruahmanna hi an zawm a ngaih thu an sawi ve bawk.