Ed Sheeran-a'n Ipswich a sponsor dawn

Khawvel huapa zaithiam lar Ed Sheeran chuan League One club Ipswich Town mipa leh hmeichhe team kawr a sponsor dawn. Ipswich leh Ed Sheeran te hian kum khat atan contract an ziak.

Jersey hmaa inziak tur hi '+ - = ÷ x' tih a ni a, a hnuaiah 'TOUR' tih a awm. Kum 30 mi Ed Sheeran chuan, "A awmzia chu a hunah puanzar a la ni ang," tiin a sawi a, a lan dan mai chuan album tihchhuah tawh hming hrang hrangah a ngaih theih.

Ipswich Town hi October 16, 1878-a din a ni a, kum 142-a upa a ni tawh. Sheeran hi Tractor Boys (Ipswich kohna) ṭantu a ni a, Portman Road-ah vawi tam inkhel a en tawh Ed Sheeran chuan, "Kan chenna chhehvel tan chuan Ipswich Town hi a pawimawh em em a, kan club hi a thlawp tlat tih ka lantirna a ni. Portman Road-a inkhel en hi nuam ka ti a, stadium-a entu awm an phal hunah ka en ve leh ang.

"United States aṭangin club neitu thar kan nei dawn a, Ipswich ṭantute tan chuan thu lawmawm a ni a, kan phur tlang hle," tiin a sawi. Ed Sheeran hi tunlai zaithiam lar ber zinga mi a ni a; Photograph (2015), Shape of You (2017), Perfect (2017) leh Happier (2018) te chu a hla larzual a ni.

Ipwsich erawh tun hmain Premier League te pawh khel ve tawh mah se League One-ah an awm mek a, table-ah pakuanaah awm mekin Champonship khel tur zawnna playoff khel pha tur chuan vanneih a ngai tawh ang.