Inrintawkna ka hloh nasa - Rossi

Valentino Rossi-a'n tun season MotoGP inelnaah point li chiah a la hmu a, a point hmuh hi intlansiak hmasa bera a hlawhchhuah a ni - tun hnaiah a zawnin inelna pathumah point a hmu phak ta lo.

Inelna an neih hnuhnung ber Spanish Grand Prix-ah Rossi hi 17-na aṭangin a tlan ṭan a, a tawpah pawh a dinhmun ngaiah hian a ding - 15-na chin chauhin point an hmu ṭhin a, season duhawm lo tak a hmang mek.

Petronas Yamaha rider Rossi chuan, "A nihna tak sawi chuan intlansiak neih hma leh neih hnu khan kei leh ka team chuan inrintawkna kan nei tlem. Jerez tlankawnga kan tlan zawh hnuah erawh hmasawnna kan hmu a, beiseina thar pawh kan neih belh.

"Harsatna langsar tak ni si lo, inelna hmachhawn dawna buaina ni ve thei si ang kha kan ngah. Chinfel tur a tam a, chuvangin team ṭha dangte nena inelna neih nghal chu thil awlsam a ni lo," tiin a sawi.

Italian rider hi a vanglai chuan midang chunga leng a ni. Tunah chuan kum 42 mi a ni tawh, a vanglai a liam tawh nachungin bike intlansiakna sang ber a la chawlhsan duh lo, atan nomawi erawh beisei phak a ni lo.

Rossi chuan, "Bike in duhthu a sam lo, mahse kan hmanraw neih ang ang hi kan hman thiam a pawimawh. Thil kal liam tawh hnu sawiin hmasawnna min pe lo a, tunah chuan beiseina nen hma lam hun kan thlir tawh zawk ang," tiin a sawi.

Tun season MotoGP hi intlansiak 21 neih tura ruahman a ni a, pahnih chu hri leng vangin a hun sawn lailawk a ni tawh. May 16, Pathianni hian French Grand Prix an tlan leh ang.