England player-te an haw

Indian Premier League-a khel England player 11 zinga pariat chuan an ram an thleng. Covid-19 vangin IPL tihtawp rih a ni a, hemi a nih avang hian foreign player-ten an ram a haw dan kawng an dap.

English player pariat zingah hian Jos Buttler, Jason Roy, Sam Curran leh Tom Curran-te an tel a, heng player-te hi an rama sorkar hriatpui hotel-ah ni 10 chhung an in quarantine leh ang.

England limited over captain Eoin Morgan bakah pace bowler Chris Jordan leh batsman Dawid Malan te India ramah an la awm a, vawiin hian an ram lamah an thlawk haw ang.

IPL-a khel Australian player-te erawh an rama luh a la theih loh avangin India chhuahsanin Sri Lanka emaw Maldives emaw an pan ang. Australia sorkarin May 15 thleng India ram aṭanga an rama thlawh luh a khap a, hun tiam zawh hian Australian player-te hi an haw thei chauh dawn.

Thawhlehni khan IPL tihtawp rih a nih tur thu an tichiang a, BCCI-in thutlukna harsa tak an siam chhan hi player leh coaching staff zinga positive an awm vang a ni. Inelna buatsaihtute chuan player leh coach-te hriselna ngai pawimawhin IPL an titawp lailawk.

IPL-a inhnamhnawih positive te chu Kolkata Knight Riders player pahnih Varun Chakaravarthy leh Sandeep Warrier, Chennai Super Kings coach pahnih Lakshmipathy Balaji (bowling coach) leh Michael Hussey (batting coach), Hyderabad Sunrisers player Wriddhiman Saha leh Delhi Capitals player Amit Mishra-te an ni.