Jazz leh 76ers an chak chiang

Nimin zing NBA regular season inkhelah Western Conference hmahruaitu Utah Jazz leh EasternConference lama pakhatna Philadelphia 76ers ten hnehna an chang a, team pahnih hian hnehna chang turin harsatna an tawk lo.

Regular season hman lai bika chak hnem ber, vawi 48 zet hnehna chang tawhtu Jazz hian San Antonio Spurs chu 126-94 in an sawp a, chak lo Spurs hi 10-naah tlahniamin an tan playoff khelh a harsa tawh dawn.

Season duhawm hmangtu Jazz tan Jordan Clarkson chuan point 30 a nei a, ani bakah hian point 24 neitu Bojan Bogdanovic a khelh ṭhat bawk avangin buaina an nei lo - tun hnaiah a zawnin match thum hnehna an chang tling ta chiah.

Jazz elpui Phoenix Suns erawh an chesual. Suns hi an khingpui Atlanta Hawks lakah 135-103 in an tlawm a, hnehna chan hnem lamah Jazz aiin vawi khatin an tlem phah, table chung bera awm tur chuan an elpui chet sual an chan tel a ngai tawh dawn.

Inkhel dangah Memphis Grizzlies chuan 139-135 in Minnesota Timberwolves an hneh a, vawi 33 an chakna chiah niin an chunga awm Golden State Warriors an kal pel chiah. Grizzlies hi tun dinhmunah chuan playoff khel phak chinah chiah an awm - GSW nen na takin playoff hmun an inchuh ang

Eastern Conference lamah chuan Philadelphia 76ers el phak an awm meuh lo. 76ers hian 135-115 in Houston Rockets an hneh. James Harden-a'n a chhuahsan hnuah Rockets hi an zuih hle, vawi 50 an chak lohna chiah niin NBA team zinga tlawm hnem ber an ni hial.

Nimin zing inkhel dangah Milwaukee Bucks chuan Washington Wizards chu 135-134 in an hneh hram. Bucks tan hian Jrue Holiday (29 points) leh Giannis Antetokounmpo (23) te an cheṭha a, a zawna vawi li chak tur hian vanneihna an mamawh tel.

Wizards tana point 42 neitu Bradley Beal-a'n second 5.3 chauh awm tawhah basket (3 points) a nei a, point khat chauhin an hniam. Bucks lamin turnover an nei zui a, mahse an hun ṭha neih hi Garrison Mathews chuan a chhawr ṭangkai thei ta lo a ni.