Hertha-in Lehmann an ban

Arsenal keeper lar ni ṭhin Jens Lehmann chu football pundit Dennis Aogo hnena a message thawn avangin Hertha Berlin chuan an club board member a nihna aṭangin an chawlhtir a, Germany international keeper hlui hian ngaihdam dilin a insawifiah thung.

Player-a nih laia Germany tana vawi 61 inlan hman Lehmann hian Dennis hi WhatsApp hmangin message-a thawn a, "Dennis hi i midum quota maw?" tiin a ziak a, midang a thawn tur chu Dennis Aogo hi a thawn palh niin a lang.

Dennis hian instagram lamah Arsenal legend message hi a tarlang vat a, "I ti takzet maw? He message hi ka chhiar tura i thawn ava ang lo em," tiin a ziak bawk - Lehmann-a message hi vun rawng inhmuhsitnaah tam takin an ngai a, Hertha board aṭangin a thlawn phah ta a ni.

Hertha thawhpui, Tennor Holding aiawha Hertha board-a tel Lehmann hi Tennor chuan a hna aṭanga an chawlhtir thu an puang a, club president Werner Gegenbauer chuan, "Kha message kha Hertha din chhante nen chuan a inang lo hle a, chi inthliarna lam hawi thil zawng zawng chu kan do vek a, Tennor Holding thutlukna hi kan pawm thlap a ni," a ti.

Kum 34 mi Aogo hian Hamburg leh VfB Stuttgart tan pawh a lo khel tawh a, Germany tan vawi 12 inlan hmanin nikum August khan inkhelh a chawlhsan - Germany-ah Sky channel tan pundit hna a thawk mek a ni.

Schalke 04, Borussia Dortmund leh VfB Stuttgart tan pawha lo khel tawh Lehmann hian ngaihdam dilna a tichhuak tawh a, "Dennis hnenah ngaihdam ka dil a, kei chuan a ngeiawm zawngin ka sawi lo. A hnathawh ṭhat avanga mi hang ho tana quota a siamsak dan sawi ka tumna mai a ni," a ti.

Aogo pawhin Lehmann nen an inbiak tawh thu sawiin German keeper ṭha ṭhin hi a ngaihdam thu a sawi a, "Mi tupawhin tihsual an nei thei a, an tihsual avanga chance pek loh hi ṭha ka ti lo," tiin a sawi.