Euro 2020 atan England inbuatsaih ṭha thei dawn lo

Europe ramte tana football inelna sang ber UEFA European Football Championship chu June 11 aṭangin khelh ṭan a ni dawn a, July 11 thleng khelh a ni ang.

Inelna hmachhawn tur ram 24 zingah England chu champion tura rinkai an ni pha a, Gareth Southgate-a'n player langsar kawl tam mah se Champions League leh Europa League-a English club-te an chet ṭhat avangin training tir lamah player an kim thei dawn lo.

Final chu
Manchester City leh Chelsea te hian May 29-ah final an khel dawn chauh. Champions League final-ah hian Gareth Southgate-a'n a koh ngei tura ngaih player pasarih Raheem Sterling, Phil Foden, John Stones, Kyle Walker, Mason Mount, Ben Chilwell leh Reece James-te an tel dawn.

Hei chauh hi a la ni lo, nizan khan Europa League semifinal khelh a ni a. Manchester United chu final khel ngei tura ngaih an ni. Arsenal-in an mual Emirates Stadium-ah Villarreal an lehthal a nih phei chuan Southgate-a lu haina a belhchhah ang.

Europe League final hi May 26-ah khelh a ni thung dawn. Manchester United player Dean Henderson, Marcus Rashford, Harry Maguire leh Luke Shaw-te chu tel ngei turah a ngaih theih. Tun hnaia che ṭha Mason Greenwood leh Aaron Wan Bissaka pawh tel thei dinhmunah an ding a, Arsenal-ah Bukayo Saka a awm ve bawk.

A buaithlak dawn
Player 11 aṭanga 14 vel zet chu training tir lamah an awm dawn lo tihna a ni a, England hian June 2 leh June 6-ah Austria leh Romania nen friendly match an khel dawn a, final khel tur player-te avangin Gareth Southgate tan hna a harsa sawt ang.

Euro 2020 khel tur sqaud hi June 1 thleng thehluh theih a ni a, England coach Southgate hian May 25-ah squad a puan rin a ni. Champions League leh Europa League final avangin Southgate-a'n ngaihtuah tel tur a ngah sawt ang.

Thu lawmawm
England chauh ni loin player ṭha ngah ram te tana thu lawmawm chu UEFA Executive Committee-in squad-a player awm thei zat 23 ni ṭhin chu 26-ah a ti pung. Chutihrualin match tinah erawh player 23 thlan chhuah zel a ngai dawn.

FIFA Laws of the Game-ah substitute-a awm theih zat tam ber chu player 12 a ni a, goalkeeper pathum an awm tel a ngai. Euro 2020-ah pawh FIFA dan bu hi an zawm zel dawn a, chutihrualin match tinah player 23 awmna squad hi a tih danglam theih ang.

June 1 thleng squad thehluh theih a ni a, chutihrualin inelna ṭan hmain player inhliam leh damlo an awm a nih chuan thlak theih a ni ang. Goalkeeper bik phei chu inelna ṭan hnuah pawh hliam leh damlohna vanga thlak theih a ni dawn.