Leeds winger Costa season a tawp

Premier League club Leeds United winger Helder Costa chu inhliam vangin tun season-ah a inlan thei dawn tawh lo. Marcelo Bielsa hote hian May 8, Inrinni zan dar 5:00-ah Tottenham Hotspur an hmachhawn ang.

Kum 27 mi Costa hi thla liam taa Manchester United nen 0-0 a an inhnehtawk ṭumin a hnungah hliam a tuar a, tun season chhungin a dam hman dawn tawh lo. Angolan winger Costa hian tun season-ah league match vawi 14 a khel a, goal thum a khung.

Season liam taa Leeds-in Championship-a nomawi an chawi khan Costa hi player pawimawh a ni pha a, match 40 khelin goal thum tho a khung. Spurs nena an inkhelh hun hian hliam vangin Kalvin Phillips (khup) leh Raphinha (malpui) te dinhmun a chiang lo bawk.

Leeds left back Ezgjan Alioski pawh season tawp rualin a contract a tawp dawn a, a hmalam hun a chiang lo. Bielsa chuan, "Club leh player an inbe mek a, ka ngaihdan sawi a rem lo. Chutihrualin inremna an neih theih chuan ka lawm khawp ang," tiin a sawi.