Alcaraz tan Nadal a la u hret

Rafael Nadal chuan Nilaini zan khan Madrid Open 2021 khelh laia a match hmasa ber a khel a, seeded pakhatna hian amah ang bawka Spanish player Carlos Alcaraz 6-1, 6-2 chu in a hneh - hnehna chang tur hian darkar khat leh minute 15 bak hun a hmang lo.

Tun hnaiah Alcaraz hi a khel hmuhnawm ṭhin, kum 18 mi chauh la ni mah se theihna a neih san avangin Nadal lakah pawh beisei a nei ngam. Mahse, clay court chunga Nadal dang tur chuan Alcaraz hi a la khauh tawk lo tih a lang.

Nadal hian last 16-ah chuan Alexei Popyrin a hmachhawn leh dawn a, a chesual viau a nih ngawt loh chuan quarterfinal a luh a rinawm. Madrid Open-ah hian vawi nga a champion tawh, tun ṭumah pawh hian rinkai a ni.

Grand Slam vawi 20 champion tawh Nadal chuan, "Barcelona Open kan khel zo chauh a, tunah inelna hautak ka hmachhawn zui leh nghal. Nikum aṭangin inkhelh dan phung a khaihlak tawh a, chuvangin ṭha taka khel chhuak tur chuan thawhrim a ngai hle.

"Hun rei tak tournament kan khelh loh avang khan Monte Carlo Masters khelh kha harsa ka ti hle, Barcelona-ah erawh hma kan sawn a, tunah hian nasa zawka hmasawn theih ka inbeisei," a ti.

May thla tawp aṭang hian French Open an khel ṭan dawn a, champion lai Nadal tan tun hun hi Paris khawpui pan tura inbuatsaihna ṭha a ni a, major title 21-na beisei chungin clay court inelna lian hmachhawn a tum.

Inkhel dangah Daniil Medvedev a vannei hram. World number 3 hian tun hma pawhin clay court-ah beisei a phak lo ṭhin, tun ṭumah pawh hian player langsar lo zawk Alejandro Davidovich Fokina nen darkar hnih chuang an inkhelh hnuah 4-6, 6-4, 6-2 in a chak hram.

Russian tlangval hian French Open khelh hmain world number 2 dinhmun luah theihna dan a nei. Mahse, chumi thleng tur chuan Madrid Open title a lak a, chumi hnuah Rome Open-ah final a luh phak a ngai - atan thil awlsam a ni dawn lo.

Kum 25 mi Medvedev hian tun hmain Rome leh French Open-ah chak ni hmel a la hmu ngai lo, atan chuan clay court season hi hun hrehawm a ni a, season tawp leh a tir lama khelh hard court tournament nghah leh a ngai dawn a nih hmel.