UCL final khelhna tur Istanbul

UEFA chuan 2021 Champions League final khelhna tur atan Ataturk Stadium, Istanbul chu an ti chiang. Europe football inelna sang ber final hi May 17-a khelh tur a ni a, Manchester City leh Chelsea ten nomawi an inchuh ang.

Istanbul, Turkey-ah Covid-19 vangin lockdown kalpui mek a ni a, hemi a nih avang hian English club pahnih final khelhna atan hian Wembley sawi rik a ni. Amaherawhchu May 17 hi Premier League khel tur zawnna Championship playoff final khelh hun a ni a, UEFA-in Istanbul-ah inlena kalpui theih a inbeisei bawk.

UEFA chuan, "UEFA Champions League final chu Istanbul-ah May 29 hian entu zat bitukin khelh a ni dawn. May 17 thlenga lockdown kalpui tur hian inkhelah nghawnga nei lo ang. UEFA chuan Turkish Football Federation leh tualchhung thuneitute nen him taka inlena kalpui dan tur a ngaihtuah mek. Entu awm thei zat leh fan-te zin dan tura ruahmanna chu kartawpah tihchhuah a ni ang, tiin thuchhuah an siam.

European football-a thuneitu sang ber UEFA chuan Manchester City leh Chelsea hnenah ticket 4,000 ve ve pek theih a inbeisei. British sorkar chuan ram dang zin chungchanga dan thar May 17 hian a ti chhuak dawn a, hei hian nghawng lian tak a nei ang.

Nikum khan Ataturk Olympic Stadium, Istanbul-ah hian final khel turin ruahmanna siam a ni a, amaherawhchu Covid-19 vangin inelna zawng zawng Lisbon, Portugal-ah sawn vek a ni.

Kum 2005 khan Ataturk Olympic Stadium-ah hian Champions League final khelh a ni tawh a, Liverpool-in ropui taka AC Milan an lehthalna inkhel a nih avangin khawvelin a theihnghilh tawh lo ang.