Rodgers-a enkawl Foxes tan chak a pawimawh

Season hmasa khan Brendan Rodgers-a'n ṭha takin Leicester City a kaihruai a, mahse season tawpah an zuih. Foxes hian an thawnthu hlui ang hi neih nawn an duh lo a nih chuan Newcastle United hneh a pawimawh dawn.

Zanin dar 12:30 hian King Power Stadium-ah Leicester hian Newcastle an lo mikhual dawn a, Rodgers-a naute hi an chak a nih chuan season thara Champions League khel turin an dinhmun a ṭha zui ang, an chak lo a nih erawh chuan hmabak a hautak dawn.

Newcastle hi table-ah 17-na an ni a, season thara Premier League khel zel turin an la him lo. Steve Bruce enkawl team hian point an mamawhna a la sang a, chuvangin Leicester tan a awlsam lo ang.

Nikum hre reng rawh
Season hmasaah Leicester City hian UCL an khel phak dawn emaw an ti hman, mahse Premier League match hnuhnung panga zinga pathumah an tlawm a, rin loh takin European football inelna sang ber hi an khel phak ta lo a nih kha.

Tun season kal laiah pathumna dinhmun an luah mek, khelh hmabak pali chiah an nei tawh. Palina Chelsea aiin point hnihin an sang a, palina West Ham nen an inkarah erawh point nga a awm thung - an hma hun chu an kutah a awm.

Foxes dinhmun a ṭha, mahse thlamuang ngawt thei an ni lo. Player 10 a khel Southampton nen 1-1 in an inhnehtawk a, tun season bik atan chuan Newcastle hi an hmachhawn tur zinga team nem ber tura ngaih an ni tawh, point thum hmuh a pawimawh dawn.

Magpies hnuah hian Manchester City nen FA Cup final khelh hmabak an nei, league-ah chuan - Manchester United, Chelsea leh Tottenham te an la hmachhawn leh dawn, fixture en mai chuan point hmuh belh tawh miah loh thut theihna a ni.

Maddison a dam
Tlarhma lamah Jamie Vardy leh Kelechi Iheanacho te an inkawp a nih chuan goal khung kawngah harsatna a awm lo ṭhin. Mahse, striker pahnih hian thlawptu ṭha an mamawh, midfielder ball pass thiam James Maddison chu zaninah inlan thei tura beisei a ni.

England international hi hliam vangin hun rei tak a chawl a, an match hnuhnung zawka Saints an hmachhawn ṭum pawh khan a inlan thei tawh. Magpies lakah chuan tun hma lama a ṭhat dang ang khel a khelh chhuah theih tawh a beisei awm.

Foxes manager Rodgers chuan, "James hi kan tana player pawimawh leh ṭangkai a ni a, khelmual chhunga a lut a nih chuan eng emaw danglam bik tak hi a tih ngei kan beisei ṭhin. Saints lamah khan 100% fit lo deuhin a inlan, tunah chuan kar khat dang a training belh leh tawh.

"Season pawimawh vanglai taka a lo kir kleh thei hi a lawmawm, player dang pawh a chawk phur," a ti a, a defender pawimawh Jonny Evans chuan hliam tenau tuar mah se Newcastle United hmachhawn tura a dam ṭhat thu a sawi tel bawk.