Man United-in ni riat chhungin match li khel dawn

Manchester United ṭantuten Liverpool nen an inkhelh hmain club neitu Glazer chhungkaw lakah lungawi lohna an lantir a, inkhelh an ṭhulh phah. Premier League buatsaihtuten inkhelh ṭhat hun hi Nilaini zan khan an puang a, May 13, Ningani zan 12:45 khelh a ni dawn.

Ole Gunnar Solskjaer-a hoten hian nizan khan Europa League semifinal-ah AS Roma an hmachhhawn a, Liverpool nen an inkhelh hma hian Aston Villa leh Leicester City an hmachhawn dawn bawk.

Manchester United-in ni riat chhung lekin match li an khel dawn a, Solskjaer-a tan player siksawi thiam a ṭul dawn hle. Covid-19 vangin hun thawl a awm thei lo a, Solskjaer-a hoten an inkhelh hun chungchang lungawi lohna a nei a nih chuan an supporter-te lo chu dem theih an nei lo.

Norwegian manager Solskjaer chuan, "Keini chuan inkhelh kan duh. Supporter-te tan Liverpool hneh ngei kan duh a, chu chu kan hna pawh a ni," tiin Reds nena an inkhelh thei lo chu pawi a tih thu a sawi.

Kum 48 mi Solskjaer chuan sawi chhunzawmin, "Supporter-te ngaihdan hi kan lak a ṭul. Tu pawhin lungawi lohna chu an lantir thei a, mahse nun phung pangngai leh buaina chhuak lo a ni tur a ni. Tun ṭumah erawh police officer zinga inhliam te an awm a, kankal thui mah mah," tiin an fan-te chet dan chungchang a sawisel.

Pathianni liam ta zan khan mi 200 vel Old Trafford chhungah an lut a, stadium pawnah mi sang chuang an awm. Police officer paruk an inliam a, Manchester United leh Liverpool inkhel tur pawh sawn a ngaih phah a ni.

Man United hian match 33 aṭangin point 67 an hmu a, season thara Champions League khel chiang turin point li chauh an mamawh tawh. Solskjaer-a hoten match nga khelh tur an la neih avangin season tharah Europe inelna sang berah an inlan ngei a rinawm a, amaherawhchu palina china awm ringawt loin pahnihnaa awm an duh ang.