Zanin dar 10-ah UCL final urlawkna Manchester City Vs Chelsea

Zanin zan dar 10:00 hian Etihad Stadium-ah Manchester City leh Chelsea ten Premier League match pawimawh tak an khel dawn. English club pahnih hi Europe club-te tana inelna sang ber Champions League nomawi inchuh tur an ni a, chuvangin tun ṭum inkhel hi UCL final urlawkna tih theih a ni.

Pep Guardiola hote hian Blues hi an hneh a nih chuan Premier League champion an ni dawn a, Thomas Tuchel-a hote tan erawh palina ni turin tha thlah a thiang lo. Etihad Stadium-a inkhel tur hi Instanbul-a inkhel tur nen chuan a inang dawn lo a, amaherawhchu club inhmachhawn turte hi a ngai bawk a nih bakah ṭan chhan tur a awm avangin inkhelh hmuhnawm tak en tur a awm ang.

FA Cup semifinal
Manchester City hi tun season-ah quadruple champion an ni thei a, amaherawhchu FA Cup semifinal-a Chelsea 1-0 a an hneh loh avangin an beiseina a thamral.

Pep Guardiola-a'n Blues an hmachhawn hmain team inlungrualna a pawimawh thu a sawi lang a, Chelsea lakah hian second keeper Zack Steffen a luhtir. Spanish manager hian American keeper bakah a team che ṭha laia a chhawr tam loh Gabriel Jesus, Raheem Sterling leh Ferran Torres te a luhtir.

Chelsea erawh Real Madrid nen an inkhelh ṭuma che ṭha Kai Havertz-a'n bul ṭan lo mah se an ṭhat dan berin an khelah a ngaih theih. Wembley Stadium-ah Thomas Tuchel-a hoten inkhel an thunun a, goal chance a ngah a, Hakim Ziyech-a goal hmangin hnena a chang.

Final urlawkna
Pep Guardiola-a'n a ngaih pawimawh ber chu Champions League nomawi a ni a, hemi a nih avang hian final urlawknaah hian sa huai a ser rinawm loh. Premier League match hnuhnung berah Man City-in Crystal Palace 2-0 in an hneh a, Sergio Aguero leh Ferran Torres ten goal an khung.

Spanish manager Pep hian Aguero chu hmun pawimawh chantirin final-a an khelh dan tur hriat loh theih ang bera game plan a siam rinawm. Thomas Tuchel erawh Pep aiin a hna a awlsam a, Spanish manager vaw let tura game plan a siam ang.

Tuchel-a hote hian Stamford Bridge-a Real Madrid an hneh ṭum pawhin chance ṭhahnem tak an nei a, goal hnih khungin an chak. Hemi ṭum hian Blues hian 32% chauh ball possession an nei a, chak erawh an phu em em lawi si.

FA Cup-a Man City an hneh ṭum pawhin Blues hian 44% ball an chang a, hnehna an chang tho. Tuchel-a hote hian tlarhnung rem phui ṭhain Christian Pulisic chakna leh Mason Mount te thiamna hmangin an nawr a rinawm a, German player talent nei ṭha Kai Havertz pawhin hmun pawimawh a chan a rinawm.

Chutihrualin Chelsea hi team nem zawk an nih miau avangin midfielder N'Golo Kante leh Jorginho te an ṭangkai leh dawn. Tuchel-a'n season khat chhungin Pep Guardiola hote vawi thum hnehna remchang a nei a, hemi thleng tur chuan zanina chak ngei a ṭul ang.

Inkhel dang
Premier League-ah palina nih inchuh boruak a sang. West Ham, Tottenham leh Liverpool te result duhthusam chu Man City-in Chelsea hneh se tih a ni.

Vawiin tlai dar 5:00-ah Spurs-in Elland Road-ah Leeds United an tlawh dawn a, Ryan Mason-a leh hote tan point thum hmuh a harsa dawn. Hammers hian Pathianni zan dar 9:00-ah Everton an hmachhawn dawn tawh a, David Moyes-a'n UCL khel turin chak ngei an mamawh tih a hrechiang.

Liverpool-in zanin dar 12:45 hian Southampton an mikhual dawn a, Jurgen Klopp-a hote hian Champions League beiseina chhi nung tur leh Europa League khel pha tur chuan point thum an hmuh a ngai. Champion lai Jurgen Klopp-a hoten season hmasa an pha lo a, Saints lakah pawh chak chiang tura dah an harsa ta hle.