Bayern champion zan

Zanin dar 7:00 hian Signal Iduna Park-ah Borussia Dortmund-in RB Leipzig an mikhual dawn a, Dortmund-in hnehna an chan chuan Bundesliga-ah Bayern Munich an champion dawn. RB Leipzig hi an chak ta zawk a nih pawhin zanin dar 10:00-a Bavarians-in Borussia Monchengladbach an hneh chuan Hansi Flick-a hote an champion tho ang.

Bayern Munich hi zanina an champion ta lo a nih pawhin tun season-ah chuan an champion ngei dawn. Hemi a nih avang hian Bundesliga-ah hi chuan champion tur ai chuan Robert Lewandowksi-a'n Bundesliga record a siam thei ang em, tih chu hriat châkawm zawk chu a ni.

Bayern legend Gerd Muller-a'n Bundesliga-ah season khat chhung lekah goal 40 a khung a, Lewy (36 goals) hian record nih rual turin goal li a la mamawh. Polish striker Lewandowski hi inhliam vangin chawl lo se chuan awlsam zawkin record hi a khum theih a rinawm. Tunah erawh Bayern hian Gladbach bakah SC Freiburg leh Augsburg te chauh an hmachhawn tawh dawn avangin Lewy hi record siam lo thei dinhmunah a ding.

Gladabch keeper Yann Sommer chuan, "Lewy hian football-ah sulhnu ropui tak a nei a, tuna record hi a sulhnu ropuina belhchhahtu tur a ni. Record siam turin duhsakna ka hlan a, kei erawhin goal venhim ka tum ang," tiin a sawi.