Man United-in Europa League final an lut

Manchester United chu Rome khawpuiah Old Trafford-a 6-2 zeta an hneh hnu AS Roma lakah 3-2 in an chak lo. Ningani zan inkhelah Ole Gunnar Solsjkaer-a hote chak lo mah se aggregate-ah 8-5 in an chak a, Europa League final an lut.

Nomawi inchuhna hi Poland khawpui lian zinga mi Gdansk-ah khelh a ni dawn. May 26, Nilaini zanah Manchester United hian Arsenal hnehtu Villarreal an hmachhawn ang.

Nomawi duh
Manchester United-in Ole Gunnar Solskjaer hnuaiah nomawi an la chawi lo a, Europa League-ah pawh risk lak an tum lo. Ni riat chhung lekin match li an khel dawn ti hre chungin Norwegian manager hian Roma hmachhawn turin a player ṭha a hahchawlhtir lo.

Inkhel bul ṭantu zingah Donny van de Beek leh Eric Bailly te tel bawk mah se player pawimawh Bruno Fernandes, Paul Pogba, Edinson Canvani, Luke Shaw, Harry Maguire leh Aaron Wan-Bissaka ten bul an ṭan vek.

Chutihrualin Paulo Fonseca hote hi en liam ngawt chi an ni lo. First leg khelh hmain anmahni ṭantuten, "Tute nge kan nih tih chu hriattir ang che u," tiin an chah a, an mualpho. Hemi hnu hian season tawpa Fonseca chhuah tur thu Roma-in an puang a, Jose Mourinho an lak tur thuin an chhunzawm leh bawk.

Fonseca hian Stadio Olimpico-ah mualpho nawn a tum lo a, thilmak thlentir tumin a player neih ṭhatte a luhtir a, ṭan phat aṭangin attacking football an khel nghal bawk.

De Gea 'Show'
Spanish goalkeeper David de Gea-a'n first keeper nihna hloh mah se Roma hmaah a ṭhatzia a pholang. Ṭan phatah De Gea hian hnai set sawt aṭanga Gianluca Mancini leh Bryan Cristante goal khung tur a dang a, Henrikh Mkhitaryan-a'n a club hlui lama goal khung theihna hun ṭha a bawhpelh.

Mkhitaryan hian goal zawnah a tauh thei lo a, goal ruakah a khung lo. Hemi hnu hian a goal khung tur chu De Gea-a'n a dansak leh bawk. Roma captain Lorenzo Pellegrini goal khung tur pawh De Gea hian a dang a, Spanish keeper hi khel ṭha lo se Man United-in goal an khung hmain final lut thei dinhmunah an ding hial ang.

Second half-ah pawh De Gea a cheṭha chhunzawm zel a, Pedro leh Pellegrini te goal khung tur a dang. Roma-in goal thum tehmeuh an khung a, chutihrualin De Gea chu awm lo se Old Trafford-a goal an chhuah zat aia tam an khung hial ang.

El Matador a vul
United keeper De Gea-a'n hna a ngah a, tlarhma lamin hna an nei meuh lo. Minute 39-naah Edinson Cavani-a'n chance ṭha hmasa ber a nei a, Uruguayan forward hian kawh zetin mikhual team tan hmahruaina goal a khung.

Second half-ah chiang zetin ball-in Harry Maguire kut a per a, penalty a chawi lo. Amaherawhchu minute 57-naah Edin Dzeko-a'n Pedro 'shot cross' a tauh goal a, ball la nghal vatin Roma rilru put hmang a lang. Minute thum hnuah Roma midfielder Bryan Cristante-a'n ṭha zetin ball per a chan fuh chu a pet goal.

Roma goal bawh a na a, De Gea zarah United an him. Vanduai thei dinhmuna an din laiin El Matador tia hminglem an pek Cavani bawk a rawn lang a, minute 68-naah Fernandes-a cross chu Uruguayan striker hian a tauh lut.

Cavani goal vangin United ngaih ṭha takin an awm a, second leg-ah erawh chak châk zawk Roma-in hnehna an chang. Minute 83-naah Nicola Zalewski-a volley ṭha zet chuan substitute Alex Telles-a ke a per a, De Gea tan dan ngaihna a awm lo.

Final an thleng ta
Manchester United hian season liam ta khan Europa League, FA Cup leh League Cup-ah semifinal an thleng vek a, pakhatahmah final an thleng zo lo. Tun season-ah FA Cup quarterfinal-ah Leicester City hneh loin an tla a, League Cup semifinal-ah Manchester City lakah an tlawm bawk.

United boss Ole Gunnar Solskjaer chuan, "Final thlen chu a nuam danglam hle. Old Trafford-a kan khelh ṭhat avangin final kan thleng. Second leg-a kan chak lo hi pawi ka ti a, a bik takin second half-a kan khelh danah ka lawm lo.

"Chutihrualin Roma kha 8-6 a hmahruai thei tur khawpin an khel ṭha a, a mak hawp mai. Ball kha kan hloh zel a, vanneihthlak takin khawvel keeper ṭha ber kan kawl hlauh. Tunah chuan final kan thlir thei tawh ang," tiin a sawi.

United hmabak a hautak
Manchester United hian May 9, Pathianni zan dar 6:35-ah Aston Villa an hmachhawn ang a, May 11, Thawhlehni zan dar 10:30-ah Leicester City nen an inkhel lehnghal dawn. Hetah hian a la tawp lo, May 13, Ningani zanah Liverpool nen Old Trafford-ah an inkhel leh bawk ang.

Norwegian manager Ole Gunnar Solskjaer chuan, "Inelna sang la tem pha loten fixtures an siam a, ṭha taka khel vek tur chuan player tan thil theih loh a ni. Duhsak kan hlawh loin ka hria. Match li kan khelh turah hian player zawng zawng an pawimawh dawn," tiin player chhawr kim a tum thu a sawi.