Juventus mualah AC Milan

Serie A match 34 khelh aṭanga point 69 hmu ve ve Juventus leh AC Milan te chu Pathianni zan dar 12:15 hian Allianz Stadium-ah an intawng dawn, Italian club lian pahnih inkhel hi nomawi inchuh ni loin Champions League khelhna hmun inchuh an ni ang.

Fixture a chhuah tirh khan mi tam tak chuan, season tawp hma match li chauh khelh tur awma Juve leh Milan intawng tur hi champion zawnna turah an ngai. Mahse, tunah chuan Inter Milan kutah league nomawi a lut fel tawh.

Andrea Pirlo kaihhruaina hnuaiah Old Lady hian champion rinkai ni chungin season bul a ṭan a, mahse season kua an kawl tawh nomawi an chan mai bakah a sang pali zinga tel lo thut thei dinhmunah an ding mek.

Milan pawh an ropui bik chuang lo. February thlatir kha chuan table chung ber luahtu an ni hial a, mahse thla hnih chhung lekin an tlu sawp. Zlatan Ibrahimovic awmna team tan UCL khelh phak chu thil lawmawm a ni tawh ang.

Juventus leh Milan coach ni tawh Fabio Capello chuan, "Serie A table hian engkim a sawifiah zo lo. Team pahnih hi an zuih a ni satliah lo a, an rilru put hmang thlengin siamṭhat an ngai. Inter hi khelh hmasak pali nei chunga an champion thei a nih chuan, an elpui club dangte hi an nep hle tihna a ni mai," a ti.

Italian manager rorum thusawi hian Juve leh Milan ṭhat tawk lohna a ti lang a, insiamṭhat an mamawh. Team pahnih hi an inhnehtawk a nih a, pangana Napoli-in inkhel dangah hnehna an lo chang ve thung a nih chuan team pathum hian point inzat an nei dawn.

Parukna Lazio pawh sawi bo theih an la ni lo, anni hian match khata khel tlem chungin Napoli chu point thum chauhin an phak lo. Anni hian zanin dar 12:15 hian Fiorentina an lenchilh ang.