Poch naute tan fiahna

Champions League semifinal aṭangin Paris Saint-Germain an tla a, manager thar Mauricio Pochettino tana tih makmawh chu Ligue 1 nomawi chawi a ni, league champion nih hi thil awlsam a ni dawn lo.

PSG hian Pathianni zan dar 12:30 hian Rennes an lenchilh dawn, match khelh hmabak pathum chiah an nei tawh. Nizan khan hmahruaitu Lille an inlan a, an chak a nih chuan point liin an fal ang, an chak lo a nih erawh chuan Poch-a naute tan hun ṭha a ni thung ang.

PSG hian Manchester City 4-1 in an ngam lo a, season hmasa final an luhna aṭang an tlak hnuah Poch chuan, "Tun aia ṭha hi chu kan phu," tiin a sawi a, mahse inkhel result tih danglam theih a ni tawh lo.

Argentine manager hian Paris club a enkawlna hmasa berah hian nomawi a chawi lo a nih chuan sawisel a hlawh dawn. Ligue 1 bakah hian French Cup khelh hmabak an la nei a, cup inelnaah hian semifinal an thleng tawh.

Poch chuan, "Team kan indin thar leh a ni a, chuvangin engkim a awlsam vek lo. Hun kal tawh chu sawi theih a ni lo, mahse nghawng tam tak a neih avangin a chingfel tur chuan hun kan mamawh. Season tawpah erawh kan hlim ngei ka beisei," tiin a la beidawng lo.