La Liga: Champion thei pali intum dawn : Barca mualah Atletico; Real khelmualah Sevilla
Tun season European top five league-a nomawi inchuh boruak 'hot' ber chu La Liga a ni e, tiin sawi ila, sawi uar lutuk kan ni lo ang.
Spanish top flight league-ah hian Atletico Madrid, Real Madrid, Barcelona leh Sevilla-ten champion an la beisei vek a, season thara Champions League khel tura tling chiang tawh team pali hi kartawp inkhelah an intum kual dawn!
Barcelona chuan zanin dar 7:45 hian hmahruaitu Atletico Madrid an mikhual dawn a, team pahnih inkarah hian point hnih chiah a awm tih hriat tel a ṭha.
Champions League semifinal-a chak lo hlim Real Madrid chu Pathianni zan dar 12:30-ah an inlan zui ve dawn bawk a, point hnih veka Atletico thlautu Real hian anni aia point lia hniam Sevilla an mikhual dawn.
Hello Suarez
Ronald Koeman-a'n Barcelona-a enkawl tirha thawm a neih lenna ber chu Luis Suarez nena an inkar chungchang a ni a, Uruguayan striker hi phone kaltlangin a mamawh loh thu a hrilh.
Barca tana a vanglai hun zawng zawng hmangtu Suarez tan he 'phone call' hi a na a, lungawi taka pawm dam chi a ni lo - European club tam takin duh mah se Spain-a cham a thlang zui a, Barca hmelma Atletico-a pan.
Koeman-a'n mamawh lo nia a inngaih Suarez-a'n a thiam a lo la theihnghilh lo a, La Liga match 28-a khelhah goal 19-a khung a, Atletico-in league-a hma an hruai theih nan player thawh hlawk a ni - zaninah goal khung châkin a tuihal ang.
November 2020 khan tun season-a a vawi khat nan team pahnih hi an lo intawng tawh a, 1-0 in Atletico an chak. Suarez erawh hetihlai hian Uruguay tana a fehchhuahna lamah Covid-19 a kai a, a club hlui a hmachhawn thei lo.
Hriatthiam har
Barcelona tan Lionel Messi chu an innghahna a la ni reng a, he striker hian tun season-ah match 44 khelin goal 36-a khung leh der tawh a, ngaihthah a thiang lo tih hrechiangtu chu Atletico an ni.
Club pahnihin kil tina player an neih ṭhat dan ringawt pawh hi ziah tham fe a ni a, chutihrual chuan tun season-a tluk leh din an fawm dan ringawt pawh hi ngaihnawm a tling - hei vang hian zaninah pawh chak tur zawk rinthiam a harsa.
Atlético hian April 25 khan rin loh takin Athletic Bilbao chu khualmualah 1-0 in an ngam lo a, Barca-in hei hi remchanga laa hmahruaina hun ṭha an nei. Mahse, Catalan club hi an tawlhthlu ve zui a, rin loh takin Granada lakah 2-1 in an tlawm.
Club ṭha pahnih hi an league match hnuhnung pahnihah erawh an chak ve ve a, an inringtawk leh tawh ang. Atletico-in hnehna an chan chuan champion a hnai sawt ang a, Barca-in hnehna an chan chuan La Liga boruak nung tawh sa a nung lehzual thung ang.
Real tan thawhlehna hun
Champions League semifinal aṭangin petchhuah an ni a, Real boruak ṭhat lai a ni lo - an midfield chhuanvawr Luka Modric, Casemiro leh Toni Kroos-te N'Golo Kante hmaah an mualpho.
Midfielder mai an ni lo. Sergio Ramos hoa inlan tlarhnung chu Chelsea tlarhma tha za rualten an chhaih chau a, tlarhma lamah lah Karim Benzema tih loh chu lak tlak an awm lo.
Chelsea laka an khelh dan avangin Real-in sawisel an hlawh a, he team hi indinthar ngai ang hiala sawi a ni - coach Zinedine Zidane thlengin sawisel an hlawh a, 'inṭhuahfai an mamawh' tiin an sel.
Real hian zaninah Sevilla ngam lo ngat se La Liga nomawi beiseina a hniam sawt ang a, Zidane leh a naute tan Santiago Bernabeu-a an dinhmun a him lo sawt bawk ang.
Tichuan...
Sevilla-in rin loh takin an league match hnuhnung berah Athletic Bilbao chu 1-0 in an ngam lo a, an nomawi beiseina a nghin phah - coach Julen Lopetegui erawh a nghing ve lo.
Real Madrid boss hlui hian, "Nomawi kan beisei zel ang," tiin a sawi a, an beiseina ti hlawhtling tur chuan Real Madrid hneh ngei ngei an mamawh - Real an ngam loh chuan an tan champion beisei a harsa ang.
Sevilla tan hnehna chang tur chuan Youssef En-Nesyri chet ṭhat a pawimawh a, Moroccan striker hian tun season inelna hrang hrangah match 48 khel tawhin goal 23-a khung a, Real tana buaina thlen turin a ṭha tawk.
December, 2020 khan tun season-a a vawi khat nan Sevilla leh Real hi an intawng tawh a, Real hi 1-0 in an chak - zaninah Sevilla-in thawnthu her danglam an tum ang.
Beiseina
Real-in Chelsea an ngam loh hnu lawkah Eden Hazard chu Blues lama a ṭhian hluite nen hlim taka an nuiho lai hmuh a ni a, a team an chak loh laia Hazard-a chet dan hian sel a hlawh nasa hle.
Mahse, Hazard hian social media lamah ngaihdam dilna a tichhuak leh tawh a, Belgian forward chuan, "Ka thiam loh a ni. Mi ngaihdan tam tak ka chhiar a, Real fan-te tih lunghnur kha ka tum a ni lo.
"Real tana khelh hi ka mangphan ṭhin a ni a, he hmunah hian nomawi chawi turin ka lo kal a ni. Season a la tawp lo a, La Liga nomawi chawi turin theihtawp i chhuah tlang ang u," a ti a, league an la beisei thu a sawi.
Ramos chuan, "Real thawnthu innghahna chu tlawmna aṭanga thawhlehna hi a ni a, league beisei tur kan la neih avangin kan chawl dawn lo," tiin Chelsea an ngam loh hnuah a sawi ve bawk - zaninah inhliam vangin Lucas Vazquez, Raphael Varane leh Dani Carvajal an chhawr a beiseiawm lo tih loh chu player lamah buaina an nei lo.
