Nadal tan Laureus World Sports Award

Infiamna peng hrang hrang huapa award siam Laureus World Sports Awards sem a ni a, award ngaihhlut Sportsman of the Year Award chu Grand Slam vawi 20 champion tawh Rafael Nadal kutah hlan a ni.

Hmeichhe lamah pawh tennis star Naomi Osaka chuan Sportswoman of the Year Award a dawng. German champion leh Champions League nomawi chawi bawk Bayern Munich chu Team of the Year atan an tlang bawk.

Tennis an vul
Season hmasa khan Nadal-a'n a vawi 13 nan French Open nomawi a chawi a, major title lak hnem lamah Roger Federer (20 titles) a nih rual chiah - player ropui pahnih hi an kalna kawngah an fal hle.

Nadal chuan, "He chawi-mawina dawn phu mi tam tak an awm, dawng thei tura chhawp chhuah nih pawh kha a nuam, chumi hnuah a vannei berah ka la ṭang zui. A vawi 20 nana Grand Slam title lak kha chu theihnghilh theih a ni tawh lo ang," a ti.

Spanish star hian tun hmain - Breakthrough, Comeback leh Main men's award te a lo dawng tawh - Laureus bikah chuan award vawi li a dawnna a ni. Mipa tennis player zingah Federer leh Djokovic ten an lo dawng tawh bawk.

Sportswoman of the Year Award dawngtu Osaka pawhin season hmasa khan US Open a la. Lifetime Achievement award pawh tennis legend Billie Jean King hnenah hlan a ni a, kum dangah pawh tennis an lo langsar fo tawh ṭhin.

Award dang
Kuminah hian a vawi khat nan Athlete Advocate award siam a ni, infiammi zingah vantlang nghawng khawpa thil ṭha ti leh entawn tlak chawimawina hi Formula 1 champion Lewis Hamilton hnenah an hlan.

F1 season hmasa khan Hamil-ton hi inelna an neih dawn apiangin an ṭhingṭhi ṭhin, hei hi midum enhranna duh loh vang a ni. Britain tlangval hian season tawpah nomawi chawiin, vawi sarih champion tawh Michael Schumacher-a record a nihrual.

Liverpool forward Mohamed Salah hnenah Sporting Inspi-ration award hlan a ni. Egypt international hian Middle East rama hmeichhe infiammite dinhmun chawisan a nih theih nan a thawhhlawk a, intluk tlanna a awm theih nan hma a la ṭhin.

Salah chuan, "Nikum kha chu kum dang aiin thil a harsa hle. Chhungkua pawh kan awmkhawm thei lo a ni a, mi zawng zawng kha inhlata kan awm a ngaih chang a awm, chutiang karah pawh mahni zawna theihtawp kan chhuah ṭhin kha a lawmawm," a ti.