Pathianni zingah Álvarez vs Saunders

Boxing khawvela thawm nei lian ber pawl Canelo Álvarez chuan Billy Joe Saunders-a hmachhawn dawn ta a, Pathianni zing dar 8:30-ah an inhnek dawn.

Fighter pahnih inhnek hma hian fight pasarih en tur a awm dawn a, zing dar 5:30 aṭangin pekchhuah ṭan a ni ang - television lamah live-a en tur a awm dawn lo a, DAZN chuan online-in a pe chhuak dawn a, DAZN hi thla khat en man Rs.69 chawi a ngai.

AT&T Stadium, Arlington, Texas, USA-a inhnek turah hian fans 70,000 vel chu pungkhawm tura beisei an ni a, Alvarez hian WBC leh WBA Super Middleweight title-a thap dawn a, Saunders hian WBO Super Middleweight title a kawl lai chu a chhawp ve thung ang.

Kum 30 mi Alvarez hian fight vawi 58-a hmachhawn tawh a, vawi khat chiah a la tlawm - a ngam loh awmchhun hi Floyd Mayweather-a ni. Vawi hnih draw result-a nei a, a career ṭantir lamah Jorge Juarez chu inhnehtawkpuiin September 2017 khan Gennady Golovkin nen inhnehtawka puan an ni bawk.

English boxer, kum 31 mi Saunders hian rin hlawh lo zawk mah se vawi 30 inhnek a hmachhawn tawhah hnehna a la chang vek a, vawi 14 ngawt a khingpui a knockout theih avangin dah hniam chi a ni lo ang.

Saunders chuan, "Canelo hi champion ropui tak a ni a, mahse, a lo hmachhawn tawh ṭhinte khan sum vang chauhin an hmachhawn. Keimah anga paukhauh leh chak tum hi a la hmachhawn ngai lo a ni," a ti a, hneh ngei a tum.

Alvarez chuan, "Fighter ṭha tak a ni. Mahse, boxing hi ka nun a ni a, ka tan chuan Saunders hi hna pakhat ve mai a ni - hnehna chang turin ka lo kal e," tiin a sawi ve thung.

Fighter hriat hlawh zawk Alvarez hian a tlem berah dollar maktaduai 15 chu inhnek aṭang hian a hlawh dawn a, pay-per-view a 60% share a neih nena chhut chuan dollar maktaduai 35 hlawh tura ngaih a ni.

Saunders-a'n dollar maktaduai 2.5 chu a hlawh tur chiang a ni a, PPV sales aṭanga a chan tur nena chhutin dollar maktaduai nga a hlawh ang - a career pumpuiah dollar maktaduai li vel hnek chhuak tawha ngaih a ni a, Alvarez-a tum tur hi a tan chuan malsawmna a ni.