Arsenal tan season a tawp : Hmabak a harsa tawh dawn
European club ṭha ten ram hrang hrangah league nomawi an inchuh a, a ṭhenin Champions League khelhna hmun an inchuh mek. Hlawhtlina uma club ṭha an buai suau suau laiin Arsenal tan erawh an nih tur ang an ni fel der!
Ningani zan khan Mikel Arteta kaihhruai Gunners hi Villarreal nen goal awm loin an inhnehtawk a, Europa League semifinal first leg-ah North London club hi 2-1 a an tlawm tawh avangin, inkhel pahnih belh khawmah English club hi an chak lo.
Premier League table laihawl luahtu Arsenal tan tun season chhungin nomawi beisei tur a awm tawh lo, season tharah European football an khelh a rinawm tak loh bawk avangin, kumin bakah nakkum thlengin an hma hun a 'Thim' viaua ngaih a ni.
An tla ta
Vanglaini chuan 'Arsenal tan goal khung ngei ngei a ngai' tiin an ziak a, hei hi Arsenal dam khawchhuah theihna awmchhun a ni. Mahse, khung teuh ringawtin a chhanhim thei tawh lo, kum 25 hnua a vawi khat nan Europe-ah an inlan dawn lo tia sawi ngam a ni ta.
Emirates Stadium-ah goal mamawh Gunners tlarhma an hriam tawk lo. Captain Pierre-Emerick Aubameyang-a'n ball kang lai a hlap thut chuan goal ban a fuh a, Gabon international ball tauh chu lut teuh viau mah se goal ban bawkin a lo dang.
Pound maktaduai 72 man Nicolas Pepe-a'n kum hnih chhung chu a man phu tawkin a khel thei ta lo, a hun ṭha neih pawh goal hrulah a thlawh liam. Rawlthar Emile Smith Rowe tawnhriat neih tlem a lang a, kum 19 mi Bukayo Saka a bo bawk.
Goal nei sa Villarreal lamin an goal venhim chauh an duhtawk lo, second half bikah phei chuan goal an nawr na zawk - mahse khung belh theihna remchang erawh an insiam thei bik lo a, final lut tura an mamawh zat an neihsa miau avangin khualmuala lungawi zawk an ni.
Chhuanlam Xhaka
Arteta-a'n Granit Xhaka chungah rinna thui tak a nghat a, tlarhnung sira khel tur an awm loh pawhin a pawt hnung hial ṭhin. Swiss international hi inkhel bul ṭan tura tih ni vek tawh mah se hliam a tuar hlauh a, damkawr Kieran Tierney chuan bul a ṭan a ngai.
Xhaka hmun ruak a zau tih chu phat theih a ni lo. Thomas Partey-a'n inrintawkna a nei tlem tih a lang a, loan hmanga hawh Martin Odegaard hi Real Madrid tana khel phak lo a nihna hmuh turin a awm, goal hmaah ball a thleng nawi leh ṭhin.
Arteta chuan, "Hun tepter tawh takah kan ruahmanna zawng zawng thlak vek a ngai. Granit khan hmun pawimawh tak a chang a, ani awm lo khan nghawng a nei na hle. Mahse chhuanlam tur erawh a ni lo, player pawimawh dangten boruak thlak theihna remchang nei mah se an vannei lo," a ti.
Spanish manager chuan sawi zawmin, "Hun tawp rak thleng khan theihtawp takmeuh kan chhuah. Goal khung theihna tur remchang bik vawi thum kan nei a, mahse a lut miau si lo. Kan hrilhhai takzet a, hnehna changtu Villarreal kan lawmpui," tiin a sawi.
Mangṭha Europe
Kum 15 liamta kha thlir kir ila, Arsene Wenger hoa an khelmual hman thiam Highbury-ah Arsenal leh Villarreal ten Champions League semifinal an khel a, kha inkhel kha Highbury bika European match hnuhnung ber a ni zui ta.
Emirates Stadium an luah chhunzawm a, khelmual ṭha leh changtlung zawkah Highbury boruak kha an la phak thei lo. An khelmual chhuanvawrah Spanish team ngai nen Europa League semifinal an khel leh a, hun eng emaw ti chhung atan inelna lianah an chawl chhunzawm dawn a nih hmel.
Chhiarkawp dan chuan Gunners hian league aṭangin Europa League an la beisei thei, mahse hei chu thil mak a thlen a ngai tawh. 1995 hnu lama an point hmuh chhiat ber ṭum an tawng a, an khelh hmabak paliah chak vek pawh ni se team dang pali an chetsual vek a ngai dawn!
Wenger hunlai khan player nei ṭha tawk lo chungin UCL an khel phak ṭhin, tunah erawh a zawna season li Europa League an khelh hnuah an thamral mek - player langsar lakluh a harsa dawn a, club neitu lamin eng tiang takin nge thuam ṭhat an tum chu hunin a la hril ang.
Emery-a'n a club hlui a ngam
Europa League a nih tawh chuan Unai Emery hi manager danglam bik a ni zel. Spanish manager hian kum riat chhunga a vawi nga nan, European football inelna sang pahnihnaah hian final vawi nga a lut.
Sevilla a enkawl laiin a zawnin ṭum thum a champion a, chumi hnuah Arsenal hi final hruai thleng mah se Chelsea an ngam lo. Tunah team nem zawk nia ngaih Villarreal enkawl chungin amah bantu Arsenal a hneh leh ta.
Villarreal manager Emery chuan, "Team ṭha tak Arsenal kan hneh theih a vangin ka lawm hle. Mahni goal veng chungin ṭha takin kan khel thei a, a pumpui kan thlir chuan chak phu zawk chu kan ni, kan duh hunah ball kan chang hnem thei kha a pawimawh.
"Goal khung theihna remchang nei zawk chu an ni ngei mai, mahse keini pawhin kan mualah hun ṭha kan khawhral ve nual tho. Tunah chuan kan chak vanga lawm hun a ni a, chumi hnuah Manchester United nen final kan khelh tur kan thlir ang," a ti.