Quarterfinal-ah Djokovic awmna Serbia

ATP Cup khelh mekah Novak Djokovic chuan singles leh doubles huangah hnehna changin Serbia chu quarterfinal a hruai thleng a, inkhel dangah Rafael Nadal chuan Spain chu hnehna a chanpui bawk.

Thawhṭanni zan khan France tlangval Benoit Paire chuan Dusan Lajovic hnehin an ram hma a hruai pui. Best of three hmanga inelna neih a nih avangin Serbia tan chetsual nawn a thiang tawh lo. Hun pawimawh lai takah Djokovic a rawn ding chhuak a, world number 2 hian Gael Monfils 6-3, 6-2 a hnehin ram pahnihte 1-1 in an inhnehtawk. Doubles hmanga chak zawk zawn niin Djokovic leh Viktor Troicki te ṭangdun chuan

Nicolas Mahut leh Edouard Roger-Vasselin te 6-3, 6-7 (5-7), 10-3 a hnehin an ram an chakpui.

Inkhel dangah Nadal awmna Spain chuan Uruguay an hneh ve bawk, world number 1 Nadal hian Pablo Cuevas 6-2, 6-1 in a hneh a, an ram tan hian world number 10 Roberto Bautista Agut a chak bawk vangin harsatna a awm lo.