Bayern Munich an champi9n

Bundesliga-ah FC Bayern Munich chu season kua chhung a zawnin an champion. Inrinni zanah Borussia Dortmund-in RB Leizpig 3-2 a an hneh avangin Bayern Munich an champion a, Bavarians hian champion an nemngheh zanah Borussia Monchengladbach 6-0 in an sawp ve bawk.

Allianz Arena-ah Bayern Munich-in team ṭha bik an nihzia an pholang a, Robert Lewandowski-a'n hattrick siamin Thomas Muller, Kingsley Coman leh Leroy Sane ten goal khat ṭheuh khungin Glabach an hneh. Bavarian-in match 32 aṭangin point 74 an hmu a, match hnih chauh khelh tur awm tawhin pahnihna RB Leipzig nen point 10-in an inthlau.

Goal 9 chu
Minute hnihna chiahah Bayern striker Lewandowski-a'n vei lam aṭanga David Alaba cross luh chu box chhung aṭangin a khung. A khat mawi tawkin goal a lut zui a, minute 23-naah Jamal Musiala pass chu Bayern ti Bayern tu Thomas Muller-a'n a khung.

Bayern an chungnung a, an theihna sang tak an pholang zel. Minute 34-naah Muller-a ball vawrh luh chu Robert Lewandowski-a'n 'bicycle kick' hmangin 'mawi tawp berin' a pet goal.

Minute 44-naah erawh Lewy hi a petu zawk a ni a, Polish striker ball pek chu Kingsley Coman-a'n a khung. First half-ah 4-0 a ni a, an la duhtawk lo. Minute 65-naah Lewandowski-a'n penalty aṭangin hattrick a siam a, Gladbach keeper Yann Sommer a bum chiang hle.

Bayern defender kum 18 mi Tanguy Nianzou-a'n minute 75-naah player hnung bera awm chungin Breel Embolo a ti tlu a, hnawhchhuah a ni. Bavarians-in player 10-a khelh hnuah pawh goal an khung tho, susbtitute Serge Gnabry pass chu amah ang bawka bench aṭanga lut Leroy Sane-a'n minute 85-naah a khung.

Lewy a bon
Robert Lewandowski-a'n Bayern legend Gerd Muller-a record - season khata goal 40 khung pha turin inkhelh hmain goal li a mamawh a, inkhelh zawhah erawh goal khat chiah a mamawh tawh.

Kum 32 mi Lewy hian season liam ta khan Bayern hi nomawi chawi theih zawng zawng a chawipui a, tun season-ah erawh hliam vanga a chawlh chhungin Champions League-ah nikum final-a an hneh PSG lakah an tlawm.

Lewy awm ta se, result a dang ngei ang tih chu sawi theih ni tawh lo mah se thil chiang erawh Polish striker hian season liam ta aiin Bundesliga-ah goal a khung tam. Bayern striker hian match 27 lek aṭangin goal 39 a khung tawh a, SC Freiburg leh Augsburg te an la hmachhawn dawn avangin record thar siam thei dinhmunah a ding.

Player ṭangkai bik
Bayern tan Lewy hi a pawimawh takzet a, Polish striker hian minute 59 danah goal khung ziahin match liah chiah goal khung loh a nei. Chutihrualin Thomas Muller hming sawi hmaih a thiang lo.

Lewy-a'n goal a khung apiangin Muller-a inrawlh deuh zel a, Raumdeuter (hmun awl siamtu) an tih mai hian tun season-ah assist vawi 17 nei tawhin kum zawnin Bundesliga-ah assist ngah ber a ni mek.

Bayern tan 'Mullandowski' te an hlu a, captain fantastic Manuel Neuer hi keeper satliah a ni lo a, keeper-sweeper a ni. Neuer hi Bundesliga-a match 100 inlan tawh zinga goal chhuah tlem ber a ni a, match 436 aṭangin goal 355 a chhuah. Kum 35 mi hian Bundesliga-a Oliver Kahn a clean sheet record vawi 203 nihrual turin match 437 chiah a mamawh a, Kahn hian match 557 a mamawh thung.

Bayern-in Philipp Lahm an kawl tawh lo a, mah se a thlakna Joshua Kimmich an nei. Kum 26 mi Kimmich hian Neuer-a chawlh hunah captain armband a hren ngei a rinawm a, team tana ahnathawh hi statistics-in a sawifiah pha lo.

A ropui e
Bayern-in Bundesliga-ah a zawnin vawi kua an champion a, Europe inelna sanga hetiang ti thei hi chu Juventus chauh an awm. Tun season-ah Juve an champion tak loh avangin season tharah Bavarians-in record an siam thei ang. Mahni awmna league thunun dangte chu Lyon (vawi 7), Real Madrid (5), FC Porto (5), PSV (4), Ajax (4) leh Manchester United (3) te an ni a, a zawna vawi kua champion hi a satliah lo hle.

Bayern Munich tan nomawi chawi hi lawmawm viau mah se manager Hansi Flick erawh a chhuah hun a hnai ve zel. Flick hian season khat leh a chanve chhung lekin Bayern hi inelna pasarihah a champion pui a, club thuneitute nena inhmuh thiam lohna avangin season tawp rualin a chhuak dawn.

Germany national team-a coach ni tura sawi Hansi Flick chuan, "Champion khelh dan tur angin kan khel chhuak a ni. Goal tam taka chak kan phu. Chutihrualin tun season-ah Bundesliga nomawi chiah kan chawi a, pawi kan tih rualin inkhel pawimawha kan player ṭangkai kan chhawr theih loh van te pawh a ni," tiin sawi.

Jupp Heynckes hnung zuiin Bayern-ah a kir leh ang em, tih zawhna chu Flick chuan, "Engmah a hriat lawk theih loh. A thleng lo ang tih ka sawi thei lo. Bayern hi ka club a ni," tiin Bavarians-a kir leh a hreh loh thu a sawi.

Lewy Goal 38
Bayern Munich striker Robert Lewandowski-a'n tun season Bundesliga-ah goal 39 a khung tawh a, season khata league bika a khung tam ber a ni. Lewy hian Borussia Dortmund-ah season li hmangin goal 8 (2010–11), 22 (2011–12), 24 (2012–13) leh 20 (2013–14) a khung. Polish striker hian 2014-15 season aṭangin Bayern tan a khel ṭan a, season hmasa berah goal 17 a khung tih loh chu goal 20 a khung tling vek. Lewy hian goal 17 a khung hnuah goal 30 (2015–16), 30 (2016–17), 29 (2017–18), 22 (2018–19), 34 (2019–20) leh 39 (2020–21) te a khung.