Saul 'Canelo' Alvarez vs Billy Joe Saunders : Alvarez-a'n damdawi inah a khingpui a thawn
Nimin zing khan boxing khawvel nghahhlelh inhnek chu a thleng ta - Saul 'Canelo' Alvarez-a'n chhuang takin WBA, WBC leh WBO super middleweight world title-a chawi kang a, Billy Joe Saunders-a'n damdawi in lam a pan thung.
AT&T Stadium, Arlington, Texas-a inhnekah chak tura rin lawk sa Alvarez hi round riat zawhah chak zawka puan a ni a, Saunders-a mit dinglam a hnek phui sak avangin British boxer corner lamin inhnek chhunzawm chiah an ngai lo a, tlawm mai an thlang.
Mipui 73,126 zet pungkhawm hmaah Alvarez-a'n a chak lawm nan a awm a chum a, Mexican boxer chuan, "A khabe ka hnek tliakin ka hria, ka trainer Eddie Reynoso hnenah pawh ka sawi a, 'A khabe ruh ka hnek tliak a ni,' tiin ka hrilh," tiin a sawi!
Kum 30 mi Álvarez-a'n hnehna a chan avangin WBA leh WBC super middleweight world title-a kawl lai chu a humhim a, Saunders-a kawl WBO title-a chhuhsak ta bawk - super middleweight kawnghren lian tham kawl kim turin IBF chiah a hmabak ta.
Alvarez-a thiam
USA-in indoor stadium-a boxing entu tam ber ṭum an tawng a, mipui sing tel pungkhawmin an beisei ang boxing hmuhnawm an hmu - Alvarez-a hmuhnawm a, rin hlawh lo Saunders-a nep bik lo.
A tir lamah Alvarez-a thiam bikna leh chet ranna a lang a, Saunders-a che hleithei lo. Mahse, an inhnek rei tawlh tawlh a, British boxer hian round rukna leh sarihnaah chuan Alvarez-a chai thei viau tawh.
Hetihrual hian Saunders-a hmachhawn hmaa vawi 58 ngawt inhnek lo hmachhawn tawh Alvarez-a tawnhriat hmuh turin a awm ṭhin a, a hun leh hmun awl neih chhunah a hnek nat ṭhin avangin Saunders-a talbuai ṭhin.
Alvarez-a'n a kut ding lam uppercut hmanga Saunders-a den fuh hnuah a hnek chhunzawm mawlh mawlh a, round kuana an ṭan leh dawn meuh chuan British boxer team lamin tlawm mai chu thutlukna finthlakah an ngai a, an tlawm.
Kan chhanhim!
Billy Joe Saunders chu vawi 31 inhnek a hmachhawnah a vawi khat nan a tlawm ve ta a, inhnek hmuhnawm tak a pholang chungin a lo cho fo ṭhin Canelo erawh a tan a la 'u' hret tih a lang.
Saunders-a promoter Eddie Hearn chuan, "Kan chhanhim a ni," tiin a fighter chu inhnek zui chi a nih loh thu a sawi a, Boxing trainer lar Joe Gallagher chuan, "Billy tan career tawp lama tawrh a tan chuan a na hret a ni," tiin a mit hliam avangin Saunders-a'n ngai a awh leh a ring tawh lo!
Canelo erawh vawi 59 inhnek a hmachhawna vawi 56 hnehna a channa chiah a ni a, vawi khat tlawmin vawi hnih a khingpui a inhnehtawkpui - kum 30 mi 'lek' a la ni bawk a, Mexican boxer ropuina hi kan hmu dawn chauhin a lang.
Floyd Mayweather laka lo tlawm tawh Canelo chuan, "Sawi thiam a harsa zawk a ni. Heti zozai min ṭan tura lo kal khawmte avang hian ka va lawm em, thu sawi mai tur pawh ka hre lo a, anni vanga ka phurna hi thua sawifiah chi a ni lo," a ti.
Hello IBF
Canelo-a'n WBA, WBC leh WBO super middleweight title-a kawl a, a duh tawk mai lo - IBF lam a hawi a, an weight division-a kawnghren awm zawng zawng chu kawl kim vek a duh!
IBF super middleweight title kawltu hi Caleb Plant-a ni a, kum 28 mi American fighter hian vawi 21 inhnek-a hmachhawnah tlawm a la nei lo. IBF title-a hlawhchhuah hnuah vawi thum inhnek a hmachhawn tawh a, a la hum vek bawk.
Canelo chuan, "IBF kawnghren hlawhchhuah leh hi ka tum chu a ni a, chu chu ruahmanna chu a ni. Ka ṭhian, ka lo kal e, i kawnghren la turin ka lo kal. Awlsam taka fight kan neih theih ka beisei a, fan-te hi an duh kan hmuhtir tur a ni," a ti.
Alvarez hian IBF title hi a hlawh chhuak leh thei a nih chuan Mexican zinga super middleweight kawnghren kawl kim vek thei awmchhun a ni ang - he thu buatsaih a nih thleng hian Plant-a'n mumal taka chhanletna a la nei lo a, twitter lamah 'emoji' pakhat a tarlang tih loh chu thuthar a awm lo.
