Dortmund-in Leipzig an hneh

Bundesliga-ah champion hriat tawh mah se Champions League khel tur a la hriat loh. Inrinni zan khan Borussia Dortmund-in Signal Iduna Park-ah RB Leipzig 3-2 in an hneh a, a sang pali zingah an awm.

Nizan khan Eintracht Frankfurt-in Mainz an mikhual a, Frankfurt hian hnehna an chang a nih chuan Dortmund hi panganaah an awm leh nghal dawn. Team tinin league match vawi hnih ṭheuh khelh tur an nei a, UCL khel tur hriatthiam la har hle.

Final tem lawkna
May 13, Ningani zan dar 12:15-ah DFB Pokal final khelh a ni dawn a, RB Leipzig leh Borussia Dortmund te an inhmachhawn dawn. Finalist pahnihte hi Inrinni zan khan league-ah an inhmachhawn a, football hmuhnawm an pho chhuak.

Erling Braut Haaland-a tel loa khel Dortmund-in bul an ṭan ṭha a, captain Marco Reus-a'n minute sarihna lekah ṭha zeta khalh lutin a pet goal. Second half-ah pawh Dortmund bawkin bul an ṭan ṭha, minute 51-naah Jadon Sancho-a'n inringtawk takin vei la aṭanga khalh lutin a pet goal.

RB Leipzig-in corner aṭanga Lukas Klostermann tauh luh hmangin minute 63-naah siphurh an sut. Leizpig an che ṭha zui a, minute 77-naah Dani Olmo hmangin an phu angin siphurh an sut.

Minute thum chiah a awm tawh tihin Jadon Sancho a rawn inlar a, fing takin Raphael Guerreiro nen Leipzig tlarhnung ṭhiatin English winger hian chakna goal a khung.

Engtin zel?
Borussia Dortmund hian hnehna an chan avangin Champions League beiseina a nung thar a, point 58 hmuin an chunga awm Wolfsburg (60) nen an inhlat loh bakah Eintracht Frankfurt pawh chak se point khat chiahin an pha lo ang.

Dortmund hian Mainz leh Bayer Leverkusen an la hmachhawn dawn, Wolfsburg hmaah RB Leipzig leh Mainz te an la awm. Frankfurt-in nizana Mainz an hmachhawn bakah Schalke leh SC Freiburg te nen an la inkhel dawn. Team pathum zingah dinhmun ṭha ber hriatthiam a har hle.

Pahnihna Leipzig pawh Champions League khel turin an la tling lo a, amaherawhchu Wolfsburg leh Union Berlin laka point khat tal an hmu a nih chuan Europe inelna sang berah an khel dawn.