Barty hnehin Sabalenka a champion

Aryna Sabalenka chuan Ashleigh Barty chu 6-0, 3-6, 6-4 a hnehin Madrid Open title a la. Belarus star hian tennis a khelh hun chhunga nomawi 10 a chawi tlinna a ni nghal chiah bawk.

Inrinni zan final inkhelah seeded pangana Sabalenka hian bul a ṭan fuh hle, minute 25 chhungin set khatna a la - Barty-i'n game a la ve miah lo a, tun hnai kum li chhunga game la loa set a hlohna hmasa ber a ni.

World number 1 Barty hian huaisen taka bei letin set hnihna chu a la let. Mahse tournament hmang ṭha pahnih inkhelah Sabalenka bawk a vannei leh a, set thumna hun pawimawh laiah a khingpui service chhuhsakin hnehna a chang.

Thla hmasa mai khan player pahnih hi Stuggart Open final-ah an intawng. Sabalenka hian set hmasa ber a lak hnuah a hnuhnung pahnih a hloh a, chak lo zawkah a ṭang; tunah erawh thawnthu a inher danglam ta.

Kum 23 mi Sabalenka chuan, "A nihna tak sawi chuan Stuttgart Open kan khelh ṭum khan ka inhliam a, mahse ka inhnukdawk duh lo. Tun ṭumah pawh hian 100% la ni lo mah ila ka inkhel lui a, tun hnai ni li chhung erawh na ka nei lo.

"Ka tan chuan chawlhkar nuam leh ṭha bik a ni chiang hle," a ti. Spain khawpuia tournament khelhah hian final lut turin set a hloh miah lo a, clay court inelna hmuna a chet ṭhat avang hian French Open atan inrintawkna a nei sang ang.

Chak lo Barty tan erawh thawhthu ngaihnawm lo a ni. Australian star hian 2019 Rome Open aṭang khan clay court-a inelna a hmachhawn zawng zawngah hnehna a chang vek a, a record duhawm tak chu a tawp.

Mipa inelna lamah Alexander Zverev chuan a ṭhianpa Dominic Thiem hnehin final a lut. Rafael Nadal pawh hnehtu Zverev hian nizan khan final-ah Matteo Berrettini a hmachhawn leh a, result erawh kan hre hman lo.