Rooney enkawl Derby an him hram

Derby County-in Championship match hnuhnung berah Sheffield Wednesday 3-3 in an chelh a, Wayne Rooney kaihhruai team hi an him hram.

Championship aṭangin Wycombe Wanderers, Rotherham United leh Sheffield Wednesday te League One-ah an relegate. Table mawngphaha awm Owls (Sheffield Wednesday sawina) hian an match hnuhnung berah Derby hi hneh se an him dawn a, hei hian relegation battle boruak sanzia a sawifiah hle.

Tla tur zawnna
Pride Park Stadium-ah Derby County leh Sheffield Wednesday te an inkhel a, him thei leh tla thei ve ve an nih avangin inkhel hi a pawimawh hle.

Wayne Rooney enkawl Rams tan draw chauh tawk mah se mikhual Owls-in Sam Hutchinson-a hmangin first half injury time-ah goal an khung. Half time-ah Derby tla thei an ni a, Rooney-a'n a naute a fuih ṭha. Second half ṭan chiahah Martyn Waghorn (49') leh Partrick Roberts (52') te hmangin Derby-in an lehthal.

Sheffield Wednesday-in Callum Paterson (62') leh Julian Boner (69') te hmangin an chhanglet leh a, Owls an him theih laiin Derby tla thei an ni leh thung. Minute 79-naah Owls defender Chey Dunkley-a'n substitute Kamil Jozwiak a ti tlu a, penalty a chawi. Martyn Waghorn-a'n inringtawk takin Derby goal thumna a khung.

Derby hmabak
Wayne Rooney kaihhruai Derby hi match hnuhnung paruka an chak loh avangin match tawp berah hlauthawng takin an awm phah. Hei chauh hi a ni lo, match hnuhnung 16 aṭangin vawi hnih chauh an chak a, vawi 11 tehmeuh an chak lo.

Derby hian match tawp berah pawh harsa takin hnehna an chang a, minute 79-naa penalty an khung hmain tla thei an ni. Heti chung hian Rooney chuan, "Season tharah tun aia ṭha zawkin kan khel ang, khelmual pawna chinfel tur ang te chinfel a ṭul," tiin a sawi.

Derby hi kum 2015 khan Mel Morris-a'n a lei a, pound maktaduai 200 vel a seng tawh. Morris hian No Limit Sports Limited hnenah hralh a phal a, mahse dan angin an la ti fel lo. Club neitu tur anga sawi hi Spanish sumdawng hausa Erik Alonso a ni.

Season thara Derby ṭha zawk hmu tur chuan club neitu tih chian a ran a ṭul dawn a, chutihrualin khelmual chhungah pawh chinfel tur a tam. Match hnuhnung pasarihah vawi khatmah an chak lo.

Engtin zel?
Championship-a champion Norwich City leh pahnihna Watford ten season tharah Premier League an khel dawn a, hmunruak pakhat la awm hi playoff hmangin Brentford, Bransley, Bourne-mouth leh Swansea ten an zawng dawn.

Playoff semifinal hi home leh away hmanga khelh tur a ni a, final hi Wembley Stadium-ah khelh a ni ang. Premier League khel tur zawnna a nih avangin ngaihven a hlawh a, champion team ai mahin playoff-a pakhatna hian ngaihven hlawh zawk ṭhin.