Neymar-a'n contract pawtsei

Paris St-Germain chuan an star player Neymar chu hun rei zawk atan contract an ziahpui. Brazil international hian kum 2025 June thla tawp thleng Paris khawpuia cham turin contarct a ziak.

Kum 29 mi Neymar hian 2017 khan Barcelona aṭangin PSG hi a zawm a, pound makatduai 200 man niin khawvel player man to ber a ni. A contract neih lai hi season thar tawp ruala zo mai tur a ni a, a pawhsei tak avangin a vanglai hun chu PSG tan a hmang zo dawn niin a lang.

PSG tan match 112 a khelh aṭanga goal 85 khungtu Neymar chuan, "He hmunah hian ka puitling tawh, thil tam tak ka zir chhuak a ni. Thil tum leh hlenchhuah tur tam tak kan la nei, club ṭha Paris St-Germain tana ka khel thei hi ka lawmin hlawhtlinna sang zawk kan chan ka beisei," a ti.

Neymar hian 2019 khan a club hlui Barcelona lama kir leh a hreh loh thu a sawi chhuak a, a thusawi hi PSG ṭantute chuan an ngaithei lo hle. Tunah erawh kum khata pound makatduai 26 hlawh turin contract a ziak ta zawk.

PSG hian Neymar bakah Kylian Mbappe-a contract pawh an buaipui mek nia sawi a ni. France international hian season thar lo awm tur daih bak contract a nei tawh lo, hmabak êng tak nei leh club lian dangin an awh rawn a nih avangin chelh beh nan sum hman hnem a ngaiin a rinawm.