Inter-in goal ngain champion an lawm

Serie A champion an nih hnua an match hmasa berah Inter Milan chuan goal nga an khung. Antonio Conte naute hian Inrinni zan khan an mikhual Sampdoria chu 5-1 a sawpin champion an nemnghet.

San Siro-a inkhelah Inter tan hian Alexis Sanchez-a'n goal hnih a khung - Roberto Gagliardini, Andrea Pinamonti leh Lautaro Martinez ten goal khat ve ve an thawh bawk a, mikhual tana Senegal winger Keita Balde khungin awmzia a nei lo.

Kar hmasa khan Inter hi anmahni hnaih bertu Atalanta an chesual a, an champion fel tawh. Pirlo naute hian league match khelh hmabak pathum an la neih chu player naupang leh langsar lo zawkte intuaihriam nan an hmang thei tawh ang.

Inrinni zan inkhel dangah Napoli chuan Spezia chu 4-1 in an sawp a, table-ah pahnihna dinhmun an luah. Serie A champion a chiang tawh a, season thara Champions League khel tur erawh a la chiang lo.

Pahnihna Napoli, Atalanta, Juventus, AC Milan leh Laizo ten beisei an la nei vek. Nizan khan Old Lady leh Milan an inkhel a, a chak lo zawk chu palina dinhmun aṭanga nek chhuah an ni ang - Serie A a la ngaihnawm zel dawn.