Barca 0-0 Atletico: Champion tur a chiang thei lo!
La Liga-ah champion tur a chiang thei lo - Inrinni zan khan Barcelona leh Atletico Madrid an inkhel a, goal khung loin Nou Camp-ah an inhnehtawk.
Atletico-in point hniha sang fal chungin hma an hruai chhunzawm a, an hnuai chiahah Barcelona an awm. Nizan khan Real Madrid leh Sevilla an inkhelh avangin table hi la danglam leh thei a ni a, he thu buatsaih a nih lai hian champion beisei team pahnih inkhel result hi kan hre hman lo.
Real-in hnehna an chang a nih chuan Atletico nen point hmuh zat inangah head-to-head ṭha zawk avangin hma an hruai ang.
Beisei loh result
January-ah kha chuan Barce-lona-in point 13 ngawtin Atletico an phak lo a, Barca boss Ronald Koeman chuan inkhelh hmain Atletico nena an inthlauhna chu point hnih leka an sawr zim leh theih a rin phak loh thu a sawi.
Mahse, Atletico tluk leh din fawm karah Barca an kaltluang a, Inrinni zan an intawn dawn meuh chuan an inkarah point hnih chiah a awm - Barca-in hei hi sawr zim lehzual a, point khata Atletico tlansan theihna remchang an nei a, an tawlhthlu.
Barca hian April 29 khan Atletico tlan pel theihna remchang an lo nei tawh a, mahse, Granada lakah an tlawm - zaninah an chak zo lo leh a, league nomawi hi an chawi lo a nih chuan Koeman-a dinhmun a derthawng sawt ang a, Lionel Messi-a nghet lo sawt bawk ang.
Ṭum dang ang thoin Atletico lakah pawh Messi hi player langsar a ni a, mahse, goal-a keng tel lo - Argentine forward-in first half-a hun duhawm a neih chu Jan Oblak-a'n a dansak a, Messi hian freekick aṭangin uiawm takin a hlah a, Gerard Pique leh Ousmane Dembele-ten an hun ṭha neih an chhawr lo bawk.
A hming Suarez
Inkhelh ṭan hmain Luis Suarez-a'n a ṭhianpa Messi-a kuah vawng vawng a, Barca chanchina player ropui pahnih hi an inngai a ni. Mahse, inkhelh ṭanna hamrik a ri a, Barca tana hlauhawm ber chu Suarez-a a ni zui.
Uruguayan striker hian first half-ah goal khung theihna chance duhawm tak a nei nghal a, mahse, Barca-a amah hrechiangtu Marc-Andre ter Stegen chuan ṭha takin a lo dansak.
Atletico tan Thomas Lemar, Marcos Llorente leh Yannick Carrasco-ten chance an nei vek bawk a, an chhawr thei bik lo. Barca tan Ronald Araujo goal khung chu offside vangin pawm a ni lo a, Suarez-a'n goal-a khunga a ngaih chu referee-in foul-a ham hman avangin pawm a ni lo bawk.
Barca-in vawi 12 shot an neihah vawi sarih chu target zawnah a kal a, Atletico-in vawi 11 shot an neih zinga paruk chu goal zawnah a kal a, goal an khung loh ve ve avangin team pahnih tan point khata lungawi a ṭul.
