Guardiola 0 - 2 Tuchel : Chelsea an hlim, Aguero leh City an ngui
Champions League final urlawkna inkhel hmuhnawm takah Chelsea-in Etihad Stadium an luhchhuah a, Manchester City 2-1 in an hneh. Thomas Tuchel-a'n Blues a enkawl hnuah FA Cup semifinal-ah Man City a hneh a, Premier League inkhel pawimawh takah hneh lehin hmabak chu UCL final a ni ta.
Inrinni zan inkhelah Man City-in Raheem Sterling hmangin hma an hruai a, Chelsea-in Hakim Ziyech leh Marcus Alonso te goal hmangin an lehthal. Pep Guardiola hote an chak loh avangin Premier League champion ni turin an la nghah leh rih a ngai a, Chelsea erawh season thara Champions League khel turin an dinhmun a ṭha hle.
Aguero hoin
Pep Guardiola-a'n tun hnaia a rinrawl ni pha lote Chelsea hmachhawn turin a thlang a; Sergio Aguero, Raheem Sterling, Gabriel Jesus, Ferran Torres, Aymeric Laporte leh Nathan Ake-te hoin bul an ṭan.
City thiampuipa Kevin de Bruyne chu bench-ah pawh dah a ni lo a; Phil Foden, Riyad Mahrez, Ilkay Gundogan leh Bernardo Silva te chu bench-ah an awm hlawm. Chelsea erawh Kai Havertz leh Jorginho te awltir bawk mah se an ṭhat danin an khelah a ngaih theih.
Mawhphurtu Aguero
Man City an khel ṭha zawk a, goal pawh an khung hmasa zawk. Andreas Christensen tihsual vangin Gabriel Jesus-a'n ṭha zetin a lalut a, a ball pek duhthusam chu Aguero-a'n la sual mah se Raheem Sterling-a'n minute 44-naah chiang zetin a pet goal.
Brazlian forward Jesus-a'n Billy Gilmour lakah penalty a hlawh chhuak a, Aguero rawn pen chhuakin Premier League-a club khat tana goal khung hnem ber Wayne Rooney record (183 goals) a nihrual turah a ngaih theih.
Argentine forward-in penalty satliahin record siam a tum lo a, panenka hmanga penalty mawi bik khung tum mah se keeper Edouard Mendy-a'n awlsam takin a mansak. Pep Guardiola hmelah a lungawi lo tih a lang a, second half-ah pawh Aguero hi thlak hmasa berin Phil Foden a luhtir.
Chelsea-in Aguero penalty hlah zarah beiseina thar an nei a, second half-ah Rodri tihsual hmang ṭangkaiin minute 44-naah Hakim Ziyech-a'n a khung. Tuchel-a naute an phur zel a, Man City pawhin dan an harsat. Timo Werner leh Callum Hudson-Odoi-te goal khung offside vangin pawm a ni lo a, Marcos Alonso-a'n keeper Ederson pet khum mah se goal zawnah a lut lo.
Man City forward Sterling-a'n Blues defender substitute Kurt Zouma lakah penalty beisei mah se referee Anthony Taylor-a'n a pe bik lo. Hun tawpah erawh Chelsesa an vannei zawk a, Werner-a ball pek chu Alonso-a'n injury time-ah a khung.
Engtin zel?
Penalty hlahtu Sergio Aguero chuan inkhelh banah ngaihdam a dil a, mawhphurtu a nih miau avangin a tih tur tak a ti. Pep Guardiola chuan, "Penalty kha lut se chuan a finzia an sawi zui ang. A hlah tak avangin an sawisel thung. Pawi kan ti tlang a, aman pawi a ti ber ang," tiin a sawi a, Argentine striker hi match pawimawhah a chhawr zui ang em tih hi zawhna lian tak a ni nghal.
Man City hi Champions League-ah rinkai zawk ni mah se Blues an chak zawn avangin inrintawkna an neih belh dawn. Thomas Tuchel-a'n Chelsea a enkawl hnuah manager ṭha Pep Guardiola (vawi 2), Diego Simeone (2), Carlo Ancelotti (1), Jurgen Klopp (1) leh Zinedine Zidane (1) te a hmachhawn tawh a, a hneh vek.
Frank Lampard-a hnuaia Champions League khel thei lo thei dinhmuna ding Chelsea kha Champions League leh FA Cup champion thei an ni a, season thara UCL khel turin an dinhmun a ṭha bawk.
