Spurs ngamtu Leeds United

Jose Mourinho kaih-hruaina hnuaiah beisei an phak lo a, manager an ban hnuah pawh beisei ang result a awm thei chuang lo. Tottenham Hotspur chu Leeds United mualah 3-1 in an tlawm - season thara European football beiseina a zuih zel.

Marcelo Bielsa enkawl Leeds lamin attacking game hmuhnawm an chhawp chhuak ṭhin a, team ṭha zawk Spurs lakah pawh mahni inven ai chuan a nawrtu nih an thlang zawk - minute 13-na lekah Stuart Dallas hmangin goal hmahruai an khung.

Elland Road-ah Totten-ham an awm mai mai bik lo, forward Son Heung-min hmangin an sut a, mahse chawlhlawk hmain Patrick Bamford-a'n Leeds hmahruai vawi hnihna goal a khung bakah, hun tawp dawnah substitute Rodrigo hmangin chak an nemnghet.

Spurs leh Harry Kane tan ni duhawm lo tak a ni. English striker hian goal vawi hnih a khungah a inngai a, mahse offside vanga hnawl a ni - ṭha taka a freekick chhuih chuan goal bar a per dawp bawk.

League match pathum chauh khelh hmabak an neih tawhah Tottenham hi pasarihna an ni mek, an chunga awm Liverpool leh West Ham te aiin match khatin an khel hnem bawk a, an tan Champions League beiseina a tlem ta hle.