Foxes an zuih leh dawn?

Leicester City an zuih mek, an hneh chian tura ngaih Southampton leh Newcastle United lakah an chak zawk loh avangin Brendan Rodgers-a enkawl Foxes chu an dinhmun a him ta lo.

Foxes hi Zirtawpni zan Premier League inkhelah Magpies lakah 4-2 in an tlawm a, season tharah Champions League khel ngei tura ngaih kha tunah chuan an dinhmun a nghet lo - an hnuaia awm Chelsea chuan an rawn lehpel tawh.

Leicester City hian an hmabakah - Manchester United, Chelsea leh Tottenham-te an la hmachhawn leh dawn a, an elpui club lian hlir an nih avangin a hautak dawn, season hmasa ang khan an zuih leh mai ang em, tih chu zawhna lian tak a ni ta.

Rodgers chuan, "Jonny Evans kha tlarhnunga kan rinrawl leh thluak bur a ni a, ani a awm lo kha a pawi," a ti. English defender Evans hi warm-up an neih laiin a inhliam a, a hmunruak luahtu Marc Albrighton-a'n a thlak zo lo.