Entu nei loa inkhelah Juve an chak

Juventus chuan an elpui Inter Milan hnehin Serie A hmahruaitu an ni leh ta, hri leng mek coronavirus vangin inkhel hi a hmuna entu an awm lo. Allianz Stadium ruakin Italian club lian hi an intawng a ni.

Pathianni zan inkhelah Juve tan Aaron Ramsey-a'n (54') goal a khung bakah Paulo Dybala (67') khung tur a siamsak. Cristiano Ronaldo-a'n nikum November 10 hnua a vawi khat nan goal khung lo mah se Ramsey a siamsak thung.

Antonio Conte kaihhruaina hnuaiah Inter Milan-in Serie A nomawi an beisei ngam a, a chung berah te pawh an awm zauh zauh. Mahse, hun pawimawh laiah an chesual leh zauh ṭhin, Juve an hneh loh avangin champion lai aiin point kuain an hniam zawk - match khatin an khel tlem zawk thung.

Inter manager Conte chuan, "Kan khel ṭha hle, danglamna siamtu chu Ramsey goal kha a ni, a bak zawng chu keini aiin champion rilru an pu zawk tih mai a ni. Player theihna chu a inthlau lo, inrintawkna kan neih chuan na takin kan um zui leh thei ang," a ti.

Inelna chungchang sawi zuiin Conte chuan, "Match khatin kan khel tlem zawk a, kan hmabak a mi Sampdoria hneh ta ila kan inthlauhna chu point ruk a ni ang. Chu point chu San Siro-a kan hloh leh tun ṭuma kan hloh hi a ni," tiin an elpui Turin club an ngam lo chu an tuar thu a sawi bawk.

Cristiano Ronaldo-a'n nikum November thla aṭang khan Serie A match a khelh 11 zetah goal a khung char char, Italian football inelna sang bera goal khung zawn rei ber record siam turin Inter laka goal khung a ngai a, a hlawhtling ta lo. Portugal captain hian Gabriel Batistuta leh Fabio Quagliarella te nen an record a inang.

Allianz Stadium-ah hian media leh club hnathawk te chauh luhtir an ni a, a lut tur chin pawh hi uluk taka endik an ni. Fans an awm loh avangin traning ground-a inkhel ang mai a ni. Mipui thawm a awm loh avangin TV aṭanga inkhel entute chuan ball pet ri leh player in au thawm pawh an hre thei. 

Juve manager Maurizio Sarri chuan, "Match kan ngah a, khelmual chhung bakah pawn lamah player rilru ti phawklek thei tur thil thleng a awm ngun hle bawk. Buaina hrang hrang karah ka nauten ṭha taka an khel thei kha a lawmawm hle," tiin a sawi.