BBC Indian Sportswoman of the Year atan Sindhu

English media lian leh rintlak BBC chuan nikum chhunga Indian hmeichhe infiammi che ṭha a thlang a, badminton player PV Sindhu chu a vawi khat nan BBC Indian Sportswoman of the Year award hlan a ni.

BBC hian chawi-mawina dawng thei tur hian Sindhu bakah hian sprinter Dutee Chand, boxer Mary Kom, wrestler Vinesh Phogat leh para-badminton player Manasi Joshi te a chhawp chhuak a, thlan bikten an endik bakah fans lamin vote an thlak hnuah Sindhu an hlan.

Nikum khan Basel, Switzerland-ah Badminton World Championship neih a ni a, khawvel huap inelna lianah hian Sindhu chuan gold medal a vaw chhuak a, Indian badminton player zingah hetiang ti thei hmasa ber a ni.

Kum 24 mi Sindhu chuan, "BBC Indian Sportswoman of the Year chawimawina hian min ti phur a, tun aia sang zawk thleng zel turin phurna min pe. Min vote-tu fans chungah ka lawm takzet bawk.

"Hmeichhe infiammi rawn chhuak thar mekte ka hrilh duh chu hei hi a ni, inrintawkna leh beiseina kan nei a nih chuan mimal leh ram tana hlawhtlinna hi kan ban phakah a awm," tiin a sawi. Hyderabad nula hian 2012 September thla khan kum 17 mi chauh ni chungin world ranking-ah a sang zual 20 zingah a tel, tun hnai kum li chhung chu a thiam zual 10 zingah a tel phak char char bawk.

New Delhi-a chawi-mawina hlanah hian hranghlui chawl tawh PT Usha chu Lifetime Achievement award hlan a ni bawk. Intlansiak huanga India ti hmingṭhatu hian infiamna a chawlhsan hnuah pawh infiammi naupang zawk a cho phurin entawn tur tam tak a hnut chhiah. Intlansiak khawvela a awm lai khan international medal 100 chuang a dawng, Indian Olympics Association chuan Best Sportswoman of the Century atan an lo thlang hial tawh a ni.