Champion lai Bengaluru pet chhuaktu ATK

Indian Super League-a sulhnu nei ṭha pahnih Chennaiyin FC leh ATK chuan final an khel dawn ta. Pathianni zan khan ATK hian semifinal hnuhnung zawkah Bengaluru FC chu 3-1 in an hneh. 

ATK hian first leg-ah 1-0 in Bengaluru hi an lo ngam lo tawh a, anmahni mualah pawh goal chhuah hmasaah an ṭang. Mahse, Kolkata club hian Roy Krishna leh David Williams (2) hmangin an chhang let a, inkhel pahnih belhkhawmah 3-2 in an chak. 

Bengaluru boss Carles Cuadrat-a'n, "Class tawk lo," tia a sawisel Ashique Kuruniyan chuan a puin hun ṭha a pek a khawhral duh lo a, minute ngana lekah a tlan chakna chhawr ṭangkai chungin Bengaluru tan goal a rawn khung.

Bangalore club-in inkhel hmasaah 1-0 in hnehna an lo chang tawh a, away goal hlu tak an neih zui avangin ATK tan minute nga chhung lekin chak tura goal an mamawh zat chu goal thumah a kai chho. 

Bengaluru-in goal an chhuah loh chuan an him tih hriain khelh dan an thlak a, 5-4-1 hmangin an khel Erik Paartalu chuan an goal hnihna a khung hialah a inngai a, offside vanga pawm a ni lo thung. 

ATK-in theihtawp chhuahin an nawr a, an hun neih ṭhat hmasa berah Roy Krishna-a siamsak chu David Williams chuan goal-ah a chantir thei lo. Mahse, Krishna hun a inher chhuak - season khata nuai 450 hlawhtu striker hian si phurh a rawn sut a, ATK an phur thar. 

ATK-in chak turin goal hnih an la mamawh cheu a, goal chhuah a thiang tawh lo bawk. Minute 63-naah Williams chuan penalty a rawn hlawh chhuak a, Australian striker hian chiang zetin goal-ah a chantir. 

Season hmasa A League-ah Williams hi Krishna nen striker inkawp fuh ber pawl an ni a, a langsar zawk erawh Krishna a ni reng - ISL-ah a danglam lo. Pathianni zanah Williams hian thawnthu a her danglam a, Das-a ball cross chu ṭha zeta tauh lutin ATK a chakpui. 

ATK an khel ṭha takzet a, a bik takin assist vawi hnih neitu Prabir Das chu fak phu a ni - tlarhmaa a ṭangkai tluk zetin tlarhnung a pui ṭha a, Krishna leh Williams-te class sanzia hmuh hmaih a harsa bawk. 

Bengaluru hi an vanduai tia sawi theih a ni bawk - Sunil Chhetri freekick goal-a lut ta lo te,  Dimas Delgado-a freekick lut lo te kha an thlirkir ang a, an ui vawng vawng ang.