Germany-ah Spurs an tho thei dawn em?

Champions League round of 16 second leg chu zanin dar 1:30-ah khelh a ni dawn a, Tottenham Hotspur chuan an mangchhia aṭanga ṭhanharh tumin RB Leipzig an lenchilh dawn. 

Spurs hian inkhel hmasa zawkah German club hi 1-0 in an lo ngam lo tawh a, Jose Mourinho nauten season hmasaa an sulhnu ropui chhunzawm turin hnehna chan an mamawh. Thawhlehni zan inkhel dangah Valencia chuan Atalanta an mikhual dawn bawk a,  Spanish club tan quarterfinal lut tur erawh chuan thilmak a thlen a ngai tawh. 

Atalanta mualah hian Valencia hi rin loh takin 4-1 ngawtin an lo tlawm tawh a, Champions League round of 16 paltlang tur chuan si thum fai tala chak an mamawh tihna a ni. 

RB Leipzig mikhuala an tlawm hnu khan Spurs-in hneh an tawng leh tawh lo. German club an hmachhawn hnuah inelna hrang hrangah match li an khel a, vawi thum an tlawm a, vawi khat an khingpui an inhnehtawkpui. 

FA Cup aṭangin Norwich City-in an pet thla a, Premier League-a an match hnuhnung berah Burnley chu 1-1 a an inhnehtawkpui leh tak avangin season thara Champions League khelh tum pawh hna hautak a tling ta. English club an hneh loh ṭum hian coach Jose Mourinho-a'n a ze ngai a chhuah a, a midfielder Tanguy Ndombele chu mipui hriatah na takin a sawisel. 

Mahse, Mourinho hnuaia captain lo ni tawh John Terry chuan sawiselna hi Portuguese manager 'tactic' zinga mi a nih thu a lo sawi tawh a, Ndombele ṭha zawk hmuh a beisei vang a ni thei. 

Tottenham hian hriat sa angin tlarhmaah an player chhuanvawr Harry Kane leh Son Heung-min chu hliam vangin an chhawr thei lo a, player pahnih tel lo hian an hriam tawk lo. 

Kum 23 mi midfielder Dele Alli chu tlarhmaah striker hna thawk turin a awm leh a rinawm a, Lucas Moura, Erik Lamela, Giovani Lo Celso leh Steven Bergwijn ten goal khung kawngah an puih a ngai ang. Mourinho-a'n Burnley an hneh loh ṭumin, "Liverpool hian Salah leh Mane chhawr thei lo se eng chen nge an thlen ang?" tiin Son leh Kane ṭangkaina a sawi a, a sawi dik. Portuguese manager tana hriat tel tur erawh hei hi a ni - Spurs fan-ten chhuanlam ni loin result lawmawm hriat an duh dawn a, zaninah chak loh an duh lo ang. 

Kum 32 mi lek nichunga Leipzig manager ni thei Julian Nagelsmann hi 'Baby Mourinho' tiin hming lem an pe a, Mourinho 'tak tak' chu intawn hmasa zawkah a hneh - zaninah pawh chak a beisei. 

German coach chuan, "Goal khung an mamawh avangin min nawr an ngai a, chance kan neih theih phah ang. Chutihrual chuan Spurs counter attack hlauhawmzia ka hria a, fimkhur kan mamawh. "London-a kan khelh dan ang khan kan khelh leh theih ka beisei a, quarterfinal luh ka inring a ni," a ti - Leipzig hi insiamṭhat mamawh lo bik erawh an ni lo. 

Spurs an ngam hnuah khan Schalke chu 5-0 in an sawp a, a hnu match hnihah draw result ve ve an nei - inhliam tharlam sawi tur an nei lo a, tun season-a goal 27 khung tawh Timo Werner bawk chu innghahna tur a ni. 

Serie A club Atalanta mualah 4-1 in Valencia an mualpho tawh a, mahni mualah au phurtu nei loa an khelh a ngai zui - home match pawimawhna pakhat chu fans an awmin a ni. 

Mahse, coronavirus hrileng vangin Mestalla Stadium-ah fans punkhawm khap a ni a, anmahni ṭantute puihna tel loin Valencia hian goal thum khung an tum dawn - a harsa ang. Spain sorkar chuan Italian team an ram chhunga an kalin fans punkhawm an phal lo a, Valencia hian Italian club an mikhual tur chu an tawrh phah ta a ni. Valencia inkhel regular taka ziak ṭhin journalist pakhat chu Atalanta muala an inkhelh ṭum khan Covid-19 a kai tih hmuhchhuah a ni bawk a, Valencia hian an player-te leh coach-te chu media hmachhawn an phal lo hial.