Arsenal-in West Brom an pet tla

Sam Allardyce kaihhruai West Bromwich Albion chu a vawi nga nan Premier League aṭangin an tla. Baggies hian khelh hmabak pathum an la neihah chak vek pawh ni se, a him china awm Burnley an umphak thei tawh lo a ni.

Pathianni zan Emirates Stadium-a inkhelah Gunners chuan an mikhual hi 3-1 in an lo hneh a, season thara European football an beiseina chhete chu a la mit lo hram hram - an tum ram thleng tur erawhin thil mak a ngai dawn.

Laipui a puak
Mikel Arteta-a'n captain Pierre-Emerick Aubameyang chu bul a ṭantir lo a, rawlthar Gabriel Martinelli thlawp turin Emile Smith Rowe, Bukayo Saka leh Nicolas Pepe te a dah a, thutlukna a siam fuh.

Minute 29-naah Saka-a cross chu laklawh nei miah loin Smith Rowe chuan a hlap lut - atan EPL goal hmasa ber a ni. West Brom insiamrem hmain Pepe-a'n mual sir aṭanga a ball lakluh chu goal kilah a hlap lut leh pawp a, chawlhlawk hmain 2-0 in hma an hruai.

Baggies tan thih tha a beih let a ngai tawh. Matheus Pereira-a'n an beiseina chhawm nung turin thui tak ball a tlanpui hnuah goal ṭha tak a khung a, mahse goal dangin a zui thei lo - hun tawp dawnah Gunners tan Willian-a'n freekick aṭangin an chak a nemnghet ta zawk.

Rawlthar rual
Europa League semifinal aṭangin an tla a, league table-ah pawh a lailawl luahtu mai an ni. Arteta hma hun tur an inrinsiak mek a, club chhung leh pawnah lawmna tur reng a awm lo - boruak rit tak karah Arsenal tan rawlthar rualin beiseina an siam.

Kum 19 mi Saka-a'n senior team tana a khelh chinah (2018 November), club player zingah ani aia assist nei hnem an awm lo - a ṭhianpa Smith Rowe tana a siamsak khan assist vawi 19 a neihna chiah a ni.

English player pahnih hi Arsenal acedemy chhuak an ni a, khelmual chhungah an huaisen bakah Gunners thisen kai an nihna a lang ṭhin. Martinelli pawh chak duha tuihal a ni tih a lang, player manto Pepe goal khung kha tih fuh palh ai chuan thiam vang niin a lang bawk.

Arteta beiseina
Tun season chauh ni loin season thar pawh Arsenal tan a harsa dawn. Gunners manager Arteta chuan a player naupangte chu club lungphum pawimawh an nih thu a sawi a, an lakah beiseina pawh a nei sang hle.

Arteta chuan, "Khelmuala pawimawh ber mai chu rilru puthmang dik hi a ni. Goal pathum kan neih kha a danglam vek a, team thawh rah leh mimal thawh ṭhatte an ni hlawm. Hmasawnna tam tak hmuh tur a awm a, lawmna tur zawngtu tan chuan chanchin lawmawm a awm," a ti.

Arsenal hian Nilaini zanah Chelsea an hmachhawn zui lehnghal dawn. Blues hi Champions League final khelh hmabak ni mah se, season thara UCL khel turin an la tling chiang bik lo, inkhel hmuhnawm a ni ang.