Madrid Open champion Zverev

Alexander Zverev chuan French Open champion a tum tih chu thil tih hmangin a lantir. German tlangval hian Pathianni zan khan a khingpui Matteo Berrettini hnehin Madrid Open title a la.

Kum 24 mi Zverev hian world number 10 lakah hian 6-7 (8-10), 6-4, 6-3 in hnehna a chang a, ATP Masters 1000 title pali a lakna chiah a nih bakah - Spain khawpuia inelna neihah hian ṭum hnih a champion tlinna a ni nghal bawk.

World number 6 hian final kalkawngah Rafael Nadal leh Dominic Thiem te a paltlang thei a, a hneh pahnih hi clay court chunga inkhel thiam bik an ni. Tun thla tawpa khelh tur Roland-Garros atan inrintawkna sang tak a neih phah ngei ang.

Madrid Open champion Zverev chuan, "A ropui ka ti, ka kalkawng thlir kir phei chuan hnehna ropui tak a ni. Tunah chuan hahdam takin champion ka lawm phawt ang. Tun tournament ang hian inelna pakhatah player ṭha ka hneh hnem ngai lo.

"Champion avang hian player ṭha ber ka ni tihna erawh a ni kher lo, inkhel ṭhenkhatah chuan vannei taka chak chang a awm," a ti a, chawlh erawh a nei ri dawn lo - tun kar aṭanga khelh ṭan tur Italian Open-ah a inlan zui ang.

Zverev chuan, "Chawlh nei mumal loa inkhelh leh nghal chu a hautak ṭhin. Mahse, Rome khawpui hi inkhelh nuam ka tihna hmun, tun hma pawha result ṭha ka lo neih tawhna a nih avangin ka phur hle," a ti.

Theihna nei sang tak ni mah se Zverev hian a thlen san ber chu ATP Masters 1000 title lak a ni mai a, inelna lian Grand Slam-ah a la hlawhtling ngai lo. Kuminah hian inbuatsaihna a nei ṭha a, ṭum danga a ngam loh ṭhin Nadal leh Thiem a hneh theih avangin beiseina a nei sang ang.