Big Sam hoin an liam

West Bromwich Albion hian season bul an ṭan fuh lo a, tlak hlauhthawn awmna an awm avangin Slaven Bilic an ban a, nikum December 16 khan Sam Allardyce an lalut - hetih lai hian table-ah a hniam ber dawt an ni.

English manager hian tun hmain season 16 chhung chu EPL-ah team a lo kaihruai tawh, a la tla chhin ngai eih lo. Baggies pawhin anmahni chhanhim tura 'Big Sam' an thlang thi thil mak a ni lo. Mahse, a vawi khat nan English football inelna sang ber aṭangin a tla ta si.

Tun hmain Allardyce-a'n dinhmun khirhkhan taka ding - Blackburn Rovers, Sunderland leh Crystal Palace te chu a lo chhan chhuak tawh. Tun ṭumah erawh match 22 a kaihhruai aṭangin vawi li chauh an chak a, duhthlan tur dang an nei lo.

Kum 66 mi Allardyce chuan, "Ka nuate theihna leh an dinhmun ka hria, inhamtang turin kan ṭha tawk. Amaherawhchu, hun ṭha vawi tam insiam thei mah ila kan mamawh zat goal kan khung thei ṭhin tlat si lo kha a pawi lai chu a ni ta.

"Zan lungchhiat thlak tak a ni a, kei aimah chuan club leh player tan khan inhamtan ka duh, mahse thil thlen danin a zir miau si lo. Kan dinhmun kan pawm thiam a ngai a, chumi aṭanga thawh chhuah leh vat chu a pawimawh," a ti.

A contract neih lai ang chuan Allardyce hian West Brom hi kum khat a la enkawl thei. Mahse a hma hun a chiang ta lo, khawtlang media-te chuan a chhuah mai an rin thu an ziak nasa, a hma hun an zawhna erawh a la chhang thei lo.

English top-flight aṭang hian Birmingham City chu vawi 12 an tla tawh a, tla hnem ber an ni. West Brom hi vawi 11 an tlakna chiah a ni a, an tan English football inelna sang bera hun hman rei a harsa tih a lang.