Real an chak zo lo; La Liga a chiang thei lo!
Inrinni zanah Real Madrid duhthusam a thleng a, an elpui Atletico Madrid leh Barcelona-te chu goal awm loin an inhnehtawk.
Pathianni zanah Real inlan hun a thleng a, an chak chuan La Liga table chung ber an luah thei tih inhre mah se an mikhual Sevilla lakah point khat an hlawh chhuak hram - 2-2 in an inhnehtawk. Sevilla-in Fernando leh Ivan Rakitic (penalty) hmangin vawi hnih hma an hruai a, Real-in Marco Asensio leh Eden Hazard hmangin an sut ve ve - an si phurh sut zawhna hi hun pek belha lut a ni!
Real-in hnehna an chan zawh loh avangin table-ah pahnihna an ni a, hmahruaitu Atletico chu point hnihin an phak lo mek - Barcelona nen an point hmuh zat a inang.
Ramos tel lohna
Real-in Sevilla an hmachhawn hmain an captain Sergio Ramos inhliam thu an hria a, June thlaa a contract hmang zo tawh mai tur defender tel loin Sevilla an mikhual.
Zinedine Zidane-a nauten hnehna an chan chuan La Liga nomawi chawina chance a sang lehzual dawn tih an hria a, Sevilla tan league nomawi beisei zui turin chak ngei ngei a ngai ve bawk.
Sevilla coach Julen Lopetegui-a'n amah lo ban tawhtu Real lakah thutlukna huaisen thlak tak siamin midfield-ah Real hneh a tum a, 4-3-3 formation a rawn hmang.
Lopetegui hian tun season La Liga-a goal 17 khung tawh, a striker chhuanvawr Youssef En-Nesyri chu bench-ah a dah mauh a, a aiah tun season-a league match 14 chiah la khel, attacking midfielder Papu Gómez chu tlarhmaa lut turin a thlang.
Beisei loh aṭangin...
Alfredo di Stefano stadium-a inkhelah Karim Benzema-a'n goal hmahruai a khungah a inngai a, mahse, French striker goal khung hi VAR hmanga ennawn a nih hnuah ball siamsaktu Alvaro Odriozola offside vangin pawm a ni lo.
Sevilla an harh zawk a, minute 22-naah holding midfielder Fernando chuan mawi zeta Casemiro leh Odriozola-a bum hnuin goal hmahruai a khung a, Real an hawihai. Lopetegui-a'n hnehna an chan chuan La Liga nomawi beiseina a nung dawn tih a hria a, Zinedine Zidane-a'n an kut aṭanga nomawi tla lai mek dawm kang turin bench-ah duhthlan tur Eden Hazard leh Asensio a la nei.
French coach-in Hazard aiah Asensio luhtir a thlang a, a tisual lo. Vinícius Júnior-a'n holam taka post a tih per hnuah Asensio a rawn lang a, Toni Kroos hnen aṭanga a ball hmuh chu si phurh sut nan a hmang.
Penalty dangdai
Real an phur dawn chauh a, minute 78-naah penalty an chawi zui - Sevilla goalkeeper Yassine Bounou chuan Benzema chauh hmachhawn chungin French striker a ti tlu a, mahse, he thil thlen hma hian Real goal lamah VAR hmanga ennawn ngai a thleng tawh.
Referee-in VAR a en phawt a, Benzema-a'n Sevilla penalty area-a ball a lakluh hma hian Real centre back Eder Militao chu anmahni penalty box-ah a handball tih a lang. Penalty hmuh inbeisei Real zawkin penalty an chawi a, tawnhriat nei ṭha Rakitic tan goal-a chantir turin harsatna a awm lo. Real-in an chhanglet thei lawk lo a, an tlawm mai dawn niin a lang hman.
Mahse, hun pek belh minute linaah Real vanneihna a her chhuak a, Kroos-a shot chuan minute 79-naa bench aṭanga luhtir Hazard-a ke a per a, Real-in si phurh an sut - hun a tawp zui a, point khatah team pahnihin lungawi an zir.
Hmabak chu
Sevilla-in an hmabak match thumah hnehna chang vek pawh ni se an chunga club pathum Atletico, Barca leh Real an chetsual tel vek a ngai dawn a, champion tur chuan thilmak an mamawh tel tawh.
Real leh Barca tan beisei a la bo lo a, beiseina tih san erawh thil harsa tak a ni dawn thung - Real hi Barca nen an point hmuh zat inang mah se head-to-head a an ṭhat zawk avangin Barca chungah an awm a, a chung pathum zingah Catalan club dinhmun a chhe ber anga sawi theih a ni.
Zidane-a naute tan chuan head-to-head hi anmahni chhan theitu a ni dawn - an hmabak match thumah chak vek se, Atletico hian an match hmabak pakhat lekah pawh draw nei se, an point hmuh zat a inang ang a, point hmuh zat inangah head-to-head record ṭha zawk Real an champion daih thei.
Zanin dar 1:30-ah champion beisei zinga mi Barcelona an inlan zui dawn bawk a, khualmualah Levante an lenchilh ang - champion tum tan tlawm a thiang tawh lo.
"Referee-te hi ka be buai ngai lo a, mahse, vawiin thil thleng kha chuan minti thinrim hle a ni. A tawpah chuan kha kha thil thlan dan a ni a, thlak danglam theih kan nei lo. Kan khelh danah ka lawm a, second half kan khelh ṭhat em avangin point khat aia tam kan phu a ni. Tunah chuan kan hmabak match thum kan ngaihtuah tawh ang." - Zinedine Zidane, Real Madrid manager
"Hnehna chan phu khawpin kan khel a, mahse, Real long shot aṭanga kan tawrh awmchhun khan kan point thum tur min chhuhsak si a ni. Penalty kha chu, official lamin penalty turah an ngai a, chu chu ka pawm mai a ni. A nihna tak sawi ila, handball leh ball loh hi sawithiam harsa ka ti a, kar hmasa lawk kha chuan kan tana ṭha lo turin referee-in thutlukna an siam". - Julen Lopetegui, Sevilla manager
La Liga top three match hmabak
Atletico Madrid
May 12 Real Sociedad (H)
May 16 Osasuna (H)
May 23 Real Valladolid (A)
Real Madrid
May 13 Granada (A)
May 16 Athletic Bilbao (A)
May 23 Villarreal (H)
Barcelona
May 11 Levante (A)
May 16 Celta Vigo (H)
May 23 Eibar (A)
*A = away (khualmual); H = home (mualneitu)
