Eintracht Frankfurt-in point hnih an hloh

Pathianni zan Bundesliga inkhelah Eintracht Frankfurt leh Mainz 1-1 in an inhnehtawk a, Borussia Dortmund tan result lawmmawm a ni. Frankfurt-in point khat chauh an hlawhchhuah avangin point 57 hmuin panganaah an awm a, khelh zat inangah Dortmund-in point 58 hmuin palinaah an awm.

Deutsche Bank Park-ah mikhual Mainz hian tun hnaiah Bayern Munich an hneh a, Frankfurt nen pawh bul an ṭan ṭha. Kum 29 mi Karim Onisiwo-a'n box pawn aṭangin a khung. Second half-ah Austrian forward Onisiwo hian goal hnihna khung theihna hun ṭha a nei a, keeper Kevin Trapp a hmachhawn hnuah goal-ah a khung thei lo.

January thla tawp aṭanga a sang pali zinga tel tawh Eintracht Frankfurt tan palinaa awm chhunzawm turin chak ngei a ṭul a, mahse point khat hmu tur pawh vanneih a ṭul. Minute 85-naah Ajdin Hrustic-a'n box pawn aṭangin a pet a, Mainz defender-in dang mah se a per chu Hrustic hian tlu chungin a pet lui hram a, mawi zetin a goal.

Injury time-ah Frankfurt striker Andre Silva-a'n a hun ṭha neih chu goal zawnah a pet thei lo a, 1-1 in an inhnehtawk. Frankfurt hian Schalke leh SC Freiburg te an la hmachhawn dawn a, an chak ve ve a nih pawhin Champions League khel thei lo dinhmunah an ding.

Frankfurt elpui Dortmund-in Mainz leh Bayer Leverkusen an la hmachhawn dawn a, point hloh ve thei an la ni. Pathumnaa awm Wolfsburg dinhmun pawh a chiang chuang lo, anni hian RB Leipzig leh Mainz an la hmachhawn ang.