Hamilton bawk a chungnung

Pathianni zana tlan zawh tak Formula 1 Spanish Grand Prix-ah Lewis Hamilton a tlan chak ber a, Britain tlangval hian driver championhsip-a hma a hruaina chu a sawhnghet nghal bawk.

Mercedes driver hian tun season intlansiak pali awm tawhah ṭum thum ngawt hnehna a chang, a hnungah hian ni dang ang bawkin Max Verstappen a thleng a, driver ṭha pahnih hian pakhatna leh pahnihna dinhmun chu midang an la kian ve lo.

Red Bull driver Verstappen-a'n vawi khat hnehna a chang tawh, ṭum dangah chuan Hamilton hnung chiahah a thleng vek - championship lama an inthlauhna chu point 14 a ni mek, vawi khat chetsuala intlansan thei reng an la ni.

World champion vawi sarih ni tawh hian kuminah pawh nomawi a chawi hmel a, tun aṭangin a hma hun chungchangah zawhna a tam hle. Season ṭan hma deuh khan Hamilton hian Mercedes tan kum khat daih chauh contract a ziak.

Kum 36 mi Hamilton chuan, "Engmah hmanhmawhna chhan tur a awm lo, inbiakna pawh uluk taka neih a ni ang. Tunah chuan intlansiak hmabak 19 kan la nei a, contract ai chuan inelna kan ngai pawimawh hmasa tur a ni ang," a ti.

Car intlansiakna sang ber F1 hi May 23, Pathianniah an tlan chhunzawm leh dawn; Monaco Circuit de Monaco, Monte Carlo-ah Monaco Grand Prix an tlan ang.