Paris Saint Germain an champion dawn lo?

Ligue 1 season hnuhnung pasarih aṭangin Paris Saint Germain-in league nomawi vawi ruk an chawi a, French football-ah an vawk lal len.

Mahse, khawvela footballer manto ber Neymar leh Kylian Mbappé (hliam vangin a chawl mek) kawltu team hi Ligue 1-a champion lo thei dinhmunah an ding mek. Pathianni zan khan PSG hian league-ah Rennes chu 1-1 in an inhnehtawkpui a, Zirtawpni zan khan an elpui Lille chuan 3-0 a Lens an hneh avangin an inkarah point thum a awm.

Ligue 1-ah match hnih chiah khelh tur a awm tawh bawk avangin PSG tan chuan nomawi beiseina a thamral tiin a sawi theih a, champion tur chuan thilmak a thlen a ngai tawh ang.

Contract thar lawmna
May 8 khan Neymar-a'n PSG-ah kum 2025 thleng khelh chhunzawm turin contract thar a ziak a, Brazilian forward tan Rennes an hmachhawn hi contract thar a ziah hnua a league match hmasa ber a ni.

First half hun pek belh minute ruknaah Neymar hian a contract thar lawm nan goal hmahruai a khung a, Layvin Kurzawa hlawhchhuah penalty aṭanga a chhuih luh a ni. PSG-in goal an khung avangin awlsam taka chak mai tura ngaih an ni a, mahse, beisei ang a ni lo - Rennes zawk an hlauhawm zui a, Mbappé tel loin Paris club tlarhma a hriam tawk lo.

Minute 70-naah Rennes lamin goal an khung ta nge nge a, Serhou Guirassy chuan minute 70-naah si phurh a rawn sut - kum 25 mi striker hi PSG tan a hlauhawm tluan chhuak zak.

PSG an chuai
Hun tawp nan minute thum chiah a awm tawh tihah PSG centre-back Presnel Kimpembe chu hnawhchhuah a ni a, French club-in point thum an hlawh chhuak dawn lo tih a chiang fel der.

Statistic thlir pawhin PSG-in chak an phu lo a, nomawi an chawi ta lo a nih pawhin dem tur an awm a nih chuan anmahni bak indem tur an awm lo ang. Rennes lamin 42% lek ball chang mah se vawi 19 ngawt shot an nei thei a, heng zinga 10 chu goal zawnah a kal - PSG hian vawi 12 shot neiin vawi li goal zawnah a kal thung.

Team pahnih player neih dan enin PSG tan Rennes laka point thum hlawhchhuah theih loh hi mualphona a ni a, Lille an champion chiang ta a nih chuan an mualphona a zual ang.

Neymar hi
PSG sawi chuan Neymar bawk a lo lang leh ṭhin. Brazilian forward hian PSG-a pan hnuah a man leh hlawh phu khawpin a la khel lo a, PSG-a a hnathawh aṭang chuan player ṭha bik huanga dah a la rem lo.

Tun season-ah pawh hliamin a tlakbuak ve reng bawk nen Neymar-a ropui hleithei lo a, league-ah match 16 chiah khelin goal riat 'lek' a khung a, assist vawi nga a nei.

Neymar hian tun season inelna hrang hrangah match 28 khelin goal 16-a khung a, assist vawi 10-a nei. Player tam tak tan hahipa sawi tham season ni mah se Lionel Messi leh Cristiano Ronaldo elpui ber tura ngaih ṭhin player tan inchhuanna tur a ni lo.

Messi hliahkhuhna ata tal chhuak a, Ballon d'Or thleng dawn beisei vanga PSG pan nia sawi Neymar hian pound maktaduai 200 man huin a la khel chhuak lo a, tun season-ah league nomawi an chawi lo a nih chuan sawisel tawk nasa pawl a ni ang.

Poch-a chuai?
PSG-in December 29 khan tuna Chelsea-a hmingṭha tak Thomas Tuchel chu an ban a, German coach an ban hian league-ah match 17 an khel hman - vawi li an tlawm a, vawi hnih an khingpui an draw.

January 2-a Mauricio Pochettino an lakluhin Tottenham Hotspur boss hlui tan a harsa tawh dawn tih chu thil chiang sa a ni a, mahse, Champions League-a Barcelona leh Bayern Munich meuh a pet chhuak chungin Poch hian league lamah hna a thawk ṭha zui lo tiin a sawi theih.

Argentine coach hian league match 19-ah PSG hi a kaihruai tawh a, vawi li a tlawm a, vawi hnih draw result a nei - a hneh loh zingah an elpui Lille an tel bawk a, tun season-ah an champion lo a nih chuan Poch tan mawhphurhna lak ngam a ṭul ang.

Hriat tel tur chu season ṭantira PSG an chet chhiat chhan kha Champions League final an khelh vang a ni a, Covid-19 vanga final khelh tlai a nih laiin Ligue 1 an ṭan san a, fixture chep tak nen French club an inkhel - Tuchel-a'n chhuanlam tur a nei a, Poch-a'n a nei ve lo.