Spanish Super Cup Kalphung thar hnuaia semifinal khel tur Real

Spanish Super Cup semifinal chu zanin dar 12:30 hian khelh a ni dawn a, Real Madrid chuan Valencia an hmachhawn ang. 

Semifinal lehlamah Barcelona leh Atletico Madrid an inkhel dawn bawk a, club pahnih erawh Ningani zan dar 12:30-ah an inkhel dawn thung. 

Spanish Super Cup hi kum dangah chuan season ṭan dawnah La Liga leh Copa del Rey champion ten nomawi inchuhin an khel ṭhin a, kumin aṭangin kalphung thlak a ni. 

Copa del Rey finalist pahnih chu Spanish Super Cup khel tura tling chiang sa an ni a, he team pahnih tih loh La Liga-a a sang pahnih chu khel turin an tling leh bawk. 

Valencia hi Copa del Rey champion nih vanga tling an ni a, Barcelona hi Copa del Rey finalist an nihna anga tling an ni bawk. 

Barca hi La Liga-ah an champion bawk avangin an hnuaia awm, league-a pahnihna Atletico Madrid leh pathumna Real Madrid chu he inelna hmachhawn tur hian an tling ve leh a ni. 

Spanish Super Cup hi Spain-ah khelh a ni dawn lo a, ram hausa Saudi Arabia-a sumdawnna hmunpui Jeddah khawpui chuan inelna hi a thleng ang. Semifinal match hnih leh final hi stadium pakhat King Abdullah Sports City-ah khelh vek tur a ni a, May 2014-a hawn stadium-ah hian mipui 62,345 lengin stadium sak nan hian dollar maktaduai 560 sen a ni. 

Season hmasa Spanish Super Cup kha Spain pawnah khelh a lo ni tawh a, Morocco-a Stade Ibn Batouta khelmualah Sevilla leh Barcelona ten an khel. 

Real Madrid tan Double B - Gareth Bale leh Karim Benzema ten Spanish Super Cup an khel thei dawn lo a, forward langsar pahnih hi Saudi-ah an zin ve lo. Tun thlasik transfer laia Real chhuahsan mai tur anga an sawi Bale hian dam lohna avangin squad a zawm ve thei lo a, transfer nen a inzawm em? tih zawhna a piang. Benzema erawh malpui hliam vanga inlan thei lo tur a ni a, French striker hian tun season-ah match 24 khelin goal 16 a khung tawh - a tel lo tur hi Real tan channa a tling ang.