Milan lakah Juventus an tlawm
AC Milan chuan Juventus 3-0 in an luhchhuah a, an muala an tlawm avangin Old Lady hmalam hun a buai zo - season thara Champions League khel phak lo dinhmunah an ding mek; match khelh hmabak pathum an la nei.
Pathianni zan Serie A inkhelah Milan tan Brahim Diaz, Ante Rebic leh Fikayo Tomori ten goal khat ṭheuh an khung a, mualneitu lam hi Cristiano Ronaldo hoa khel ni mah se goal an nei thei lo.
A pawimawh
Allianz Stadium an thlen hmain Milan manager Stefano Pioli chuan, "Team enkawl hna ka thawh china match pawimawh ber a ni dawn," tiin a sawi lawk a, champion thei tawh lo mah se club lian hneh ngei a tum ruh hle.
Juventus defender Giorgio Chiellini chuan Juan Cuadrado-a corner pet tauh luh theihna remchang nei mah se goal zawnah a tauh lo. Juve keeper Wojciech Szczesny tihsual vangin Diaz-a'n goal hmahruai a khung ta zawk.
Rodrigo Bentancur khung tur Milan keeper Gianluigi Donnarumma-a'n ṭha zetin a dansak a, keeper Szczesny-a'n a tihsual nawhreh nan Kessie penalty dang mah se hun tawp dawn lamah Rebic leh Tomori te a goal erawh a dang thei lo.
Milan manager Pioli chuan, "Inkhelah chuan duhthusam ang thlap a awm thei lo. Tun ṭuma kan khelh danah erawh sawisel tur a awm lo, ka naute khan an puitling tawh tih an lantir avangin ka lawm hle," tiin a sawi.
Bang dawn lo
Andrea Pirlo hi tawnhriat nei lo chunga Juventus lamin an 'risk' kha a ni a, an beisei ang result an nei lo. Juve manager hian a hna chu bansan mai a la tum lo a, tun aia ṭha zawkin a naute a kaihhruai theih a la beisei.
Zawhna chhangin Pirlo chuan, "Ka bang ang maw? A chhanna chu bang lo ang tih a ni e. Juve enkawl hna hi phur leh thatho tak chungin ka thawk a, club hian min mamawh a nih phawt chuan ka hna hi kalsan tumna ka nei hran lo.
"Tun aia ṭha zawk hian hna ka thawk thei tih ka hria, chumi tur chuan coach chauh ni loin team pumpui kan ṭanrual a ngai. Hmalam kan thlir ang a, thil ṭha zawk lo thleng tur chu kan beisei tur a ni ang," tiin a sawi.
Old Lady hi Serie A table-ah pangana an ni mek a, an hnuaia awm Lazio aiin point ngain an sang zawk - mahse Lazio hian match khatin an khel tlem zawk. Juve dinhmun a ṭha lo, chutih rualin an chunga awm Napoli (70 points), Milan (72) leh Atalanta (72) te chu tlan pelh theih vek an la ni.