Man United-in Man City an la chelh

Manchester United-in Inrinni zan khan Aston Villa 3-1 in an hneh a, Ole Gunnar Solskjaer-a hoten point thum an hlawhchhuah avangin Premier League-ah Manchester City an la champion lo.

Villa Park-ah Bertrand Traore hmangin Villa-in goal khung hmasa mah se Man United-in Bruno Fernandes, Mason Greenwood leh Edinson Cavani te goal hmangin an lehthal. Solskjaer-a hote hian point 70 an hmu a, match li khelh hmabak la neiin hmahruaitu Man City point 10-in an pha lo.

Goal li a lut
Aston Villa-in Jack Grealish a tel loin a khel a, an khel erawh a nung tho. Mualneitu hian minute 24-naah goal an khung hmasa a, United midfielder Fred-a pass sual aṭanga inṭan ni mah se Bertrand Traore hnathawh sawi nepsak theih a ni lo. Kum 25 mi Traore hian Victor Lindelof a tlan pel hnuah mawi zetin goal kilah a pet lut.

First half-ah Man United-in a chhanletna an nei lo a, goal an chhuah belh loh nan keeper Dean Henderson-a'n ṭha zetin Ollie Watkins-a goal khung tur a dansak. Second half-ah Villa defender Douglas Luiz-a'n ṭul lo takin box chhungah Paul Pogba a ti tlu a, French midfielder penalty hlawhchhuah hi minute 52-naah Bruno Fernandes-a'n keeper Emiliano Martinez bum nan a hmang.

Team ṭha zawk United an phur a, Mason Greenwood-a'n minute 56-naah ṭha zetin a pet goal. Mikhual team hian hliam vangin captain Harry Maguire an chan a, amaherawhchu chak turin harsatna an tawk lo. Substitute Edinson Cavani-a'n minute 87-naah Marcus Rashford-a cross a tauh goal a, ball hmu tura Uruguayan striker insiamrem dan chu zir tham a tling.

Villa an vanduai zui a, minute 89-naah striker Watkins chu box chhungah tluin penalty beisei mah se referee-in tluk derin vangin yellow card vawi hnihna a pe a, a hnawt chhuak. Hun pangngaiah Douglas Luiz ball tauhin Greenwood-a kut per mah se United-in penalty an chawi lo a, Solskjaer-a hoten 3-1 in hnehna an chang.

Danglamna penalty
Aston Villa boss Dean Smith chuan, "Inkhel ti danglamtu chu penalty a ni. Luiz khan Pogba kha a khawih fuh ngei a, tlukna tur a ni em? Manchester City leh Chelsea inkhel kha ka en a, Sterling kha a hnung aṭangin vawi li lai an khawih fuh chungin penalty an pe lo. Football thlir ṭhin ho pawh hian referee thutlukna hi an hriatthiam ka ring tawh lo," tiin penalty vanga chak loah a inngaih thu a sawi.

Villa-in point 48 an hmu tawh a, chak se chuan Europa League beiseina a la awm. Tunah erawh season thara Europe inelnaa inlan a harsa tawh ang. Man United tan erawh an hmelma Manchester City champion hun an tih khawtlai avangin an lawm ang. Pep Guardiola hoten champion turin point thum an mamawh a, May 14, Zirtawpni zanah Newcastle United an hmachhawn dawn.

Chutihrualin Manchester United-in Leicester City leh Liverpool an la hmachhawn dawn a, point thum an hloh a nih chuan Manchester City hi an inkhelh leh hma hauhin an champion tho ang.